ҳуқуқ
ДАР МАСИРИ ШАРАФУ НОМУС
Эълон гардидани соли 2017 - Соли ҷавонон, ки дар Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии мамлакат садо дод, барои ҷавонони саодатманди кишвар боз як марҳалаи камолот ва дастёбӣ ба ҳадафҳои бунёдӣ ба шумор меравад. Бо истифода аз ин фурсати муносиб ҳар як ҷавони огоҳ метавонад бо амалӣ намудани нуктаҳои марбут ба сиёсати давлатии ҷавонон ва дар партави ғамхориҳои роҳбарияти давлату Ҳукумат ба қаламрави саодат бирасад.
Дар Паём таъкид гардид: «Татбиқи босамари сиёсати давлатии ҷавонон аз рӯзҳои нахустини соҳибистиқлолӣ дар меҳвари фаъолияти Ҳукумати Тоҷикистон қарор дорад. Аксарияти аҳолии Тоҷикистонро ҷавонон ташкил медиҳанд, ки онҳо давомдиҳандаи кору фаъолияти насли калонсол, неруи созанда ва иқтидори воқеии пешрафти ҷомеа, хулоса, ояндаи миллат ва давлат мебошанд». Агар ин таъкиди Сарвари давлат аз як сӯ барои мо ҷавонон боиси ифтихор бошад, аз сӯи дигар масъулиятест, ки бояд онро бо меҳнати арзандаву иқдомҳои созанда дар саҳифаи рӯзгори хеш сабт намоем. Дар идома Пешвои миллат изҳор доштанд, ки «Ҳукумати Тоҷикистон ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардидани онҳо имконият фароҳам меорад». Аз ин гуфтаҳо бармеояд, ки ҷавҳари сиёсати давлатии ҷавононро дар Тоҷикистон пуштибонии иқдому ташаббусҳои созандаи ин неруи пешбарандаи ҷомеа ташкил медиҳад. Бинобар ин, наврасону ҷавонони моро зарур аст, ки ҷавобан ба ин ғамхориҳо тамоми саъю талоши хешро ба донишандӯзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника ва бунёдкорӣ равона созанд.
Воқеан, Соли ҷавонон эълон шудани соли 2017 нишонаи олии муҳаббату самимият ва эҳтирому боварии Пешвои миллат ба ҷавонон аст.
Маҳз дастгириву ғамхориҳои Пешвои миллат аст, ки ҳузури фаъоли ҷавонон дар ҳамаи соҳаҳои хоҷагии халқи мамлакат бармалост. Аз ҷумла, имрӯз дар мақомоти судии кишвар ҷавонони лаёқатманду ҳуқуқшиносони касбӣ фаъолият мекунанд, ки дар пешрафти соҳа нақши намоён доранд. Танҳо дар суди шаҳри Душанбе беш аз 30 нафар ҷавон соҳиби кор аст, ки аз онҳо 4 нафар дар мақоми судя мебошанд. То кунун дар кори судяҳои ҷавон иштибоҳи ҷиддие ба амал наомада, онҳо дар баррасии парвандаҳои судӣ пойбандии худро ба қонунгузорӣ нишон дода, таъмини адолати судиро дар меҳвари фаъолият қарор додаанд. Бояд чунин ҳам бошад, зеро Пешвои миллат ба қудрату дониш ва зарфияту тавонмандии ҷавонон дар рушду ободии Ватан боварии комил доранд ва ба он такя менамоянд. Сарвари давлат хостори онанд, ки ҷавонон бо қадамҳои устувори хеш дар масири шарафу номус саҳми арзандаи худро дар ободии Ватани маҳбуб мегузоранд.
Асомуддин БОБОХОНЗОДА,
муовини раиси суди шаҳри Душанбе,
Олуфтабону АСКАРЗОДА,
корманди дастгоҳи суди шаҳри Душанбе
Баёни ақида (0) Санаи нашр: 08.02.2017 №: 30 Мутолиа карданд: 2924
