ҳуқуқ
ПУРСИШ ва ПОСУХ
Ба саволҳо Ғуфрон БОЙМАТОВ - узви Иттифоқи адвокатҳои Ҷумҳурии Тоҷикистон ва Айналишо АЙНАЛИШОЕВ, муовини сардори Раёсати адлияи Вилояти Мухтори Кӯҳистони Бадахшон, ҷавоб доданд. Зимнан, агар хонандагони гиромӣ пурсише доранд, метавонанд бо телефони 238 - 54 - 16 ба мо муроҷиат намоянд.
- Дар асоси ҳалномаи суди шаҳри Хуҷанд собиқ шавҳарам аз қайди манзили истиқоматие, ки дар асоси шаҳодатномаи ҳуқуқ ба мерос ба ман тааллуқ дорад, кӯчонда шуда, ҳамзамон аъзои оилаи молик, яъне ман дониста шудааст. Суд як қисмати даъвои маро дар мавриди аз манзили истиқоматӣ кӯчондани охирон рад кардааст. Ҳангоми дар ин манзили истиқоматӣ зиндагии якҷоя доштанамон собиқ шавҳарам якчанд маротиба маро мавриди латукӯб қарор дода буд, ки дар ин бора ҳуҷҷатҳои тасдиқкунанда ба суд пешниҳод шудааст. Оё ин ҳалномаи судӣ ба меъёрҳои муқаррарнамудаи қонунгузории амалкунанда мутобиқат дорад?
Таҳмина, сокини шаҳри Хуҷанд
- Тибқи меъёрҳои муқаррарнамудаи Кодекси манзили Ҷумҳурии Тоҷикистон бо тартиби судӣ аз қайди манзил кӯчонда шудани шаҳрванд, аз ҳуқуқи истифодабарии манзил маҳрум гардидани ӯро ифода мекунад. Агар собиқ шавҳаратон шуморо якчанд маротиба мавриди латукӯб қарор дода, қоидаҳои зиндагонии умумиро мунтазам вайрон карда бошад, пас суд метавонист дар асоси ҳуҷҷатҳои пешниҳодгардида ӯро дар баробари аз қайди манзил кӯчондан, масъалаи аз хона кӯчонданашро низ ҳаллу фасл намояд. Дар ин ҳолат шумо ҳуқуқ доред, ки аз болои ҳалномаи суди зинаи аввал ба суди марҳалаи кассатсионӣ шикояти кассатсионӣ баред.
- Кадом намудҳои фаъолият ба ҳисоби собиқаи корӣ дохил мешаванд?
М. СОБИР, сокини ноҳияи Ишкошим
- Ба собиқаи корӣ фаъолияте дохил мешавад, ки дар асоси шартномаи (қарордоди) меҳнатӣ дар корхонаю муассисаҳо, ташкилоту кооперативҳо, сарфи назар аз истифодаи шаклҳои моликият ва хоҷагидорӣ, инчунин дар асоси узвият дар хоҷагиҳои деҳқонӣ (фермерӣ) ва дигар кооперативҳо, новобаста аз хусусияту давомнокии кор ва муддати танаффус, иҷро карда мешавад.
Мутобиқи моддаи 63 Қонуни Ҷумҳурии Тоҷикистон “Дар бораи таъмини нафақаи шаҳрвандони Ҷумҳурии Тоҷикистон” ба собиқаи корӣ, инчунин ҳар коре, ки зимни иҷрои он корманд мавриди суғуртаи иҷтимоии давлатӣ қарор гирифтааст, фаъолияти эҷодии аъзои иттифоқҳои эҷодӣ, хизмати ҳарбӣ, хизмат дар мақомоти давлатии амнияти миллӣ ва корҳои дохилӣ, таҳсил дар мактабҳои олӣ ва миёнаи махсус, омӯзишгоҳҳо, аспирантура, докторантура ва ординатураи клиникӣ, корношоямии муваққатӣ, ки дар давраи кор ба амал омадааст, вақти ни-гоҳубини маъюби гурӯҳи 1 ё бачаи маъ-юби то 16 - сола, нигоҳубини пиронсоли ба синни 80 расида, вақти нигоҳубини кӯдакони хурдсол аз ҷониби модаре, ки муваққатан кор намекунад, вале танҳо то вақти ба синни 3 расидани ҳар як кӯдак, ҷамъ ба муддати умумии 6 сол дохил карда мешавад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 21.02.2017 №: 39 Мутолиа карданд: 2383
