ҳуқуқ
РИСОЛАТИ ВАТАНДОРӢ
Хизматчиёни ҳарбии ҷузъу томҳои Қувваҳои Мусаллаҳ дар тӯли 24 соли фаъолият барои ҳифзи марзу буми кишвар, дастовардҳои Истиқлолияти давлатӣ, пойдории сулҳу субот аз худ ҷасорату мардонагӣ нишон дода, ҳомиёни диловари Ватан буданашонро собит сохтанд. Мо - ҷавонон ҳаргиз қаҳрамонию ҷоннисории онҳоро фаромӯш нахоҳем кард.
Дар моддаи 43-и Конститутсияи Ҷумҳурии Тоҷикистон дарҷ шудааст, ки “Ҳифзи Ватан, ҳимояи манфиати давлат, таҳкими истиқлолият ва иқтидори мудофиавии он вазифаи муқаддаси шаҳрванд аст”. Аз ин рӯ, ҳар як ҷавони меҳандӯсту ватанпараст, худшиносу худогоҳ бояд зимни адои хизмати ҳарбӣ, такмили малакаю маҳорати ҷангӣ ва обутоби ҷисмонӣ ин вазифаи муқаддаси худро бо ҳисси ифтихор ва масъулияти баланд иҷро намояд. Барои насли наврас хизмат дар сафи Қувваҳои Мусаллаҳи мамлакат муҳимтарин мактаби обутоби ҷисмонӣ ва ҳаётӣ мебошад. Маҳз дар ҳамин ҷо ҷавонписарон сабақи шуҷоату мардонагӣ гирифта, муҳофизати хоки поки Ватанро ба дигарон меомӯзанд. Вақте ки мо ватандӯстӣ мегӯем, пеш аз ҳама, муҳофизати Ватан ва якпорчагии марзу буми кишварро дар назар дорем. Вазифаи ҳар як шаҳрванди ватандӯст афзун намудани дастовардҳои Истиқлолияти давлатӣ ва таҳкими рукнҳои давлатдорӣ аст, ки яке аз онҳо Қувваҳои Мусаллаҳи Тоҷикистон мебошад.
Имрӯз, ки ҳифзи Ватан, таҳкими сулҳу субот, осоиштагии мардум ҷавҳари асосии ҷомеаи демократӣ ва ҳуқуқбунёд маҳсуб меёбад, мо бояд тамоми дониш, таҷриба ва маҳорату малакаи худро барои фардои дурахшони ин куҳандиёр сарф намоем. Сокинони мамлакат ҳис намоянд ва хотирҷамъ бошанд, ки Артиши тавоно доранд ва онҳоро аз ҳар гуна хатару таҳдидҳо ҳимоя карда метавонад. Ҳарчанд, Артиши миллии мо дар вазъияти бисёр вазнини сиёсиву иқтисодии кишвар таъсис дода шуд, вале дар натиҷаи тадбирҳои мунтазам андешидаи Ҳукумати мамлакат марҳала ба марҳала устувору қавитар гардида, имрӯз бо мутахасисони соҳибихтисос ва соҳиби донишу малакаи баланди касбӣ, техникаву таҷҳизоти муосир таъмин мебошад ва ба неруи пуриқтидор табдил ёфтааст. Ҳайати шахсии Қувваҳои Мусаллаҳ дар тӯли ин солҳо барои ҳифзи дастовардҳои истиқлолият, таҳкими сулҳу субот ва ваҳдати миллӣ, мубориза бар зидди исёнгарон, гурӯҳҳои террористиву экстремистӣ ва дигар дастаҳои мусаллаҳи ҷинояткор фидокориву мардонагӣ нишон дод.
Мо - ҷавонони Тоҷикистони соҳибистиқлол бояд мисли онҳо далеру шуҷоъ бошем, бо ифтихор аз Ватану ватандорӣ даст ба корҳои созандагию бунёдкорӣ зада, кишвари маҳбубамонро боз ҳам зебову шукуфон гардонем ва нагузорем, ки ҳеҷ бадхоҳе амнияту осоиши мардумамонро халалдор созад.
Шариф НАБОТОВ,
корманди Китобхонаи миллии Тоҷикистон
Баёни ақида (0) Санаи нашр: 22.02.2017 №: 40 Мутолиа карданд: 2353
