ҳуқуқ
ҶИНОЯТ ВА ҶАЗО
13 соли ҳабс барои қаллобӣ
Суди ноҳияи Рӯдакӣ шаҳрванд А. П. Нуралиевро бар асоси се моддаи Кодекси ҷиноятии Ҷумҳурии Тоҷикистон гунаҳгор ҳисобида, ба муҳлати 13 сол аз озодӣ маҳрум кард.
Пешбурди парвандаи ҷиноятӣ нисбат ба ӯ аз ҷониби Прокуратураи генералӣ бо моддаҳои 247 қисми 4 банди «б» (қаллобӣ ба миқдори махсусан калон), 3381 қисми 2 бандҳои «а», «б» (такроран, ғайриқонунӣ додани қитъаи замин аз ҷониби гурӯҳи шахсон бо маслиҳати пешакӣ») ва 340 қисми 2 бандҳои «а», «б», «в» (сохтакории ҳуҷҷат ва ба соҳибияти каси дигар додани он) - и Кодекси ҷиноятӣ анҷом ва ба суд ирсол шудааст.
Тибқи иттилои сомонаи Прокуратураи генералии Ҷумҳурии Тоҷикистон, номбурда дар ҳамдастӣ бо Ҳоҷиамон ва Холаҳмад ном шахсон ба боварии шаҳрванд Х. С. Эвазова ва дигарон даромада, бо ваъдаи додани замин аз ҳудуди ноҳияи Рӯдакӣ онҳоро гумроҳ намудааст. А.Нуралиев дар 6 ҳолат аз шаҳрвандон ҳудуди 1000 то 7000, дар маҷмӯъ 30 600 доллар гирифта, ба онҳо ҳуҷҷатҳои қалбакӣ оид ба ҷудо намудани қитъаҳои замини наздиҳавлигӣ дода, зарари махсусан калони моддӣ расондааст.
Боздошти гумонбари қатли писар ва ҷароҳати падар
Зимни гузарондани чорабиниҳои оперативӣ - ҷустуҷӯӣ аз ҷониби кормандони милитсия марди 41-солаи сокини деҳаи Янгибоғи ноҳияи Турсунзодаро ба гумони содир намудани ҷинояти куштор боздошт намуданд.
Гумонбаршуда 22 - юми феврали соли ҷорӣ ба манзили истиқоматии ҷавони 19 - солаи сокини ҳамин деҳа омада, дар пайи муноқиша бо зарби корд ин ҷавон ва падари 41 - солаи ӯро маҷрӯҳ кард. Бино ба иттилои сомонаи Вазорати корҳои дохилӣ, дар натиҷа, ҷавони 19 - сола ҷароҳати вазнини ҷисмонӣ бардошта, дар беморхона ба ҳалокат расид ва падараш бистарӣ гаштааст.
Нисбат ба гумонбаршуда парвандаи ҷиноятӣ оғоз гардида, тафтишот идома дорад.
Нашъаҷаллоб 8 сол паси панҷара рафт
Шаҳрванд З. А. Хусравбеков бо ҷурми интиқоли ғайриқонунӣ ва ба соҳибияти каси дигар додани 1 килограмму 654,3 грамм маводи нашъаовари навъи «ҳашиш» 8 сол паси панҷара рафт.
З. Хусравбеков ҳанӯз моҳи ноябри соли 2016 дар ҳудуди шаҳри Душанбе ба гумони даст доштан дар ин ҷиноят аз ҷониби кормандони мақомоти ҳифзи ҳуқуқ дастгир шуд. Пас аз анҷоми тафтиши пешакӣ парвандаи ҷиноятӣ ба суд ирсол гардида, номбурда бо ҳукми суди ноҳияи Фирдавсии шаҳри Душанбе дар асоси моддаи 200 қисми 3 бандҳои «в», «г»-и Кодекси ҷиноятии Ҷумҳурии Тоҷикистон гунаҳгор ва ба муҳлати ҳашт сол аз озодӣ маҳрум гардид.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 02.03.2017 №: 48-49 Мутолиа карданд: 1948
