ҳуқуқ
ПАС АЗ ЧОПИ МАҚОЛА...
Прокуратураи ноҳияи Бобоҷон Ғафуров мақолаи «Назарфиребӣ. Дар бораи истифодаи ғайримақсадноки замин дар Суғд»-ро, ки дар рӯзномаи «Ҷумҳурият» таҳти № 7, аз 11 январи соли 2017, ба нашр расида буд, мавриди барррасӣ қарор дод.
Дар матлаб масоили вобаста ба натиҷаи ҷамъбасти санҷиши прокуратураи ноҳияи Бобоҷон Ғафуров, бо ҷалби мутахассисони Кумитаи идораи замин, ки моҳи ноябр - декабри соли 2016 оид ба ҳолати истифодаи ғайримақсадноки заминҳои барои гармхонаҳо ҷудогардида сурат гирифта буд, матраҳ шудааст.
Бояд гуфт, ки қаблан дар пайи санҷиши фаъолияти хоҷагии деҳқонии «Бародарон» ҶДММ «Шоҳиҷаҳон» шаҳрвандон С. Ҳоҷибоев, А. Ағлуков, С. Бобоҷонов, М. Файзиева ва дигар истифодабарандагони замин як қатор қонуншиканиҳо ошкор ва нисбат ба шахсони масъул тибқи Кодекси ҳуқуқвайронкунии маъмурии Ҷумҳурии Тоҷикистон, парвандаҳои ҳуқуқвайронкунии маъмурӣ оғоз ва барои бартараф намудани қонуншиканиҳо дастур дода шуда буд.
Пас аз чопи мақола дар «Ҷумҳурият» масъалаи зикргардида бори дигар мавриди санҷиш қарор гирифта, муайян гардид, ки дар ин самт қонуншиканиҳо ҳанӯз ҳам ҷой доранд. Шахсони масъули ҷамоатҳои деҳоти Хистеварз ва Овчиқалъача нисбат ба дастури додашуда беэътиноӣ зоҳир намуда, вазифаҳои худро ба таври зарурӣ иҷро накардаанд. Вобаста ба ин, аз ҷониби прокуратураи ноҳия нисбат ба муҳандис - заминсозони Ҷамоати деҳоти Хистеварз М. Ғафуров ва Ҷамоати деҳоти Овчиқалъача Ҳ. Маҳмудов қарорҳо дар бораи ба ҷавобгарии интизомӣ кашидан қабул гардида, ба мақомоти иҷроияи маҳаллии ҳокимияти давлатии ноҳия баҳри бартараф намудани камбудиҳо пешниҳод ирсол шуд.
Прокуратураи ноҳияи Бобоҷон Ғафуров масъалаи зикршударо зери назорати қатъӣ қарор дода, оид ба ҳар як қонуншиканӣ чораҳои дахлдор меандешад.
Р. Қ. ПИРАҲМАДОВ,
прокурори ноҳияи Бобоҷон Ғафуров,
мушовири давлатии адлияи дараҷаи 3
Баёни ақида (0) Санаи нашр: 03.03.2017 №: 50 Мутолиа карданд: 1831
