ҳуқуқ
ПУРСИШ ва ПОСУХ
Ба саволҳо Ғуфрон БОЙМАТОВ, узви Иттифоқи адвокатҳои Ҷумҳурии Тоҷикистон ва Фарҳод ТОИРОВ, менеҷери департаменти муносибат ва ҳимояи Ташкилоти ҷамъиятии Ассотсиатсияи миллии занони соҳибкори Тоҷикистон, ҷавоб доданд. Зимнан, агар хонандагони гиромӣ пурсише доранд, метавонанд бо телефони 238-54-16 ба мо муроҷиат намоянд.
- Ман собиқаи кории 40 - сола дорам. 15 сол дар собиқ Ҷумҳурии Шӯравии Сотсиалистии Ӯзбекистон ва Федератсияи Русия, дар вазифаҳои гуногун кор кардам. Бигӯед, ки ин понздаҳ сол ҳангоми ба нафақа баромадан ба назар гирифта мешавад?
И. ҶАЛОЛОВ, ноҳияи Ашт
- Моддаи 69-и Қонуни Ҷумҳурии Тоҷикистон «Дар бораи таъмини нафақаи шаҳрвандони Ҷумҳурии Тоҷикистон» пешбинӣ намудааст, ки тамоми давраи кори шаҳрвандон дар собиқ давлатҳои узви иттиҳод ба собиқаи кории онҳо ҳисоб карда мешавад. Аз ин муқаррароти қонун бармеояд, ки ҳангоми ба нафақа баромадан 15 соли собиқаи кории шумо дар давраи собиқ ИҶШС бояд ба инобат гирифта шавад.
- Дар як манзили истиқоматӣ бо зану фарзандонам, иборат аз 4 оила, зиндагӣ мекунем. Аз соли 2012 инҷониб барои гирифтани қитъаи замини наздиҳавлигӣ ба мақомоти дахлдор муроҷиат менамоям. Вале, масъулон мушкили моро осон гардондан намехоҳанд, яъне қитъаи замин ҷудо намекунанд. Чӣ бояд кард?
Н. С., сокини ноҳияи Бохтар
- Қитъаи замин дар Ҷумҳурии Тоҷикистон моликияти истисноии давлат мебошад ва масъалаи ҷудо кардани он бо мақсадҳои тибқи қонун муқарраршуда аз ҷониби мақомоти иҷроияи маҳаллии ҳокимияти давлатии шаҳру ноҳияҳо амалӣ карда мешавад. Агар дар деҳот зиндагӣ кунед, вобаста ба эҳтиёҷмандии шумо ва аҳли оилаатон аз тарафи ҷамоати шаҳрак ва ё деҳот пешниҳоди асоснок омода шуда, барои баррасӣ ба мақомоти иҷроияи маҳаллии ҳокимияти давлатӣ ирсол мегардад. Аммо, агар ба гурӯҳи эҳтиёҷмандон дохил шаведу шуморо бо қитъаи замини наздиҳавлигӣ таъмин накарда бошанд, он гоҳ метавонед мутобиқи талаботи моддаи 254 Кодекси мурофиавии граждании Ҷумҳурии Тоҷикистон беамалии масъулонро дар суд мавриди баҳс қарор диҳед.
- Шавҳарам барои дарёфти кор ба Федератсияи Русия рафта, пас аз муддати муайян аз ман талаб дорад, ки агар хоҳиши давом додани зиндагии якҷояро дошта бошам, ақди никоҳамонро дар суд бекор карда, ба ӯ шаҳодатномаи талоқро ирсол намоям. Ман аз зиндагии якҷоя бо ӯ соҳиби 2 фарзанди ноболиғ мебошам. Илтимос, оқибати ҳуқуқии чунин амалро тавзеҳ диҳед?
С. А., сокини ноҳияи Вахш
- Дар асоси муқаррароте, ки дар Кодекси граждании Ҷумҳурии Тоҷикистон омадааст, ақди никоҳ хусусияти ҳуқуқофаринӣ дорад, яъне аз лаҳзаи бақайдгирии ақди никоҳ дар бахши Сабти асноди ҳолати шаҳрвандӣ байни зану шавҳар ҳуқуқ ва уҳдадориҳои муайян пайдо мешаванд. Дар ҳолати бекор кардани ақди никоҳ бошад, ҳуқуқ ва уҳдадориҳои занушавҳарӣ аз байн мераванд. Аз ин рӯ, шумо набояд дидаву дониста ба вайронкунии ҳуқуқҳои худ даст занед.
Шуъбаи ҳуқуқи рӯзномаи “Ҷумҳурият”
Баёни ақида (0) Санаи нашр: 09.03.2017 №: 53 Мутолиа карданд: 1580
