порлумон
ИМТИЁЗИ ГУМРУКӢ. МУСОИДАТ БА ВОРИДОТИ БЕШТАРИ МОШИНҲОИ НАВ
Мошинҳои наве, ки аз соли бароришашон як сол нагузашта ва то 10 ҳазор километрро тай намудаанду ба кишвар ворид мешаванд, ба андозаи 50 дарсад аз супурдани пардохтҳои гумрукӣ озод мегарданд.
Ин матлаб дар ҷаласаи Маҷлиси намояндагони Маҷлиси Олӣ зимни баррасии лоиҳаи ворид намудани илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2017» аз ҷониби Неъматулло Ҳикматуллозода, вазири рушди иқтисод ва савдои ҷумҳурӣ, ироа гардид. Назар ба гуфтаи мавсуф, мақсад аз ворид намудани илова ба қонуни мазкур дастгирии бахши соҳибкорӣ ва нав кардани парки автомобилии кишвар мебошад, ки дар оянда барои ташкили хидматрасониҳои нақлиётӣ дар доираи стандартҳои муосир мусоидат менамояд.
Зикр гардид, ки лоиҳаи қонун дар асоси дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки аз Паёми навбатиашон ба Маҷлиси Олӣ бармеояд, таҳия гардидааст. Мувофиқи қонунгузорӣ мавриди амал қарор додани муқаррароти қонун аз 1 январи соли 2017 эътибор пайдо намудааст. Он соҳибкороне, ки аз моҳи январи соли 2017 ба кишвар мошинҳои нав ворид намудаанд, аллакай аз имтиёз бархӯрдоранд.
Шукурҷон Зуҳуров, Раиси Маҷлиси намояндагон, қабули лоиҳаи қонуни мазкурро муҳим арзёбӣ кард ва иброз дошт, ки минбаъд соҳибкорон ба ҷойи мошинҳои кӯҳнаву фарсуда ба мамлакат мошинҳои нав ворид месозанд.
Мунаввари САФАР, «Ҷумҳурият»
Баёни ақида (0) Санаи нашр: 17.03.2017 №: 59 Мутолиа карданд: 3269
