порлумон
20 МАРТ – РӮЗИ ФАРҲАНГ. БОЗ ЯК ҶАШН ДАР ТАҚВИМИ РАСМИИ КИШВАР
Бо мақсади арҷгузорӣ ба арзишҳои фарҳангӣ ва ба ин васила таваҷҷуҳи ҷомеаро ба он ҷалб намудан ба тақвими расмии кишвар 20 март ҳамчун Рӯзи фарҳанг ба расмият дароварда мешавад.
Ин нукта дар ҷаласаи навбатии иҷлосияи сеюми Маҷлиси намояндагони Маҷлиси Олии Ҷумҳурии Тоҷикистон даъвати панҷум, ки таҳти раёсати Абдуҷаббор Азизӣ, муовини аввали Раиси Маҷлиси намояндагон, баргузор шуд, баён гардид. Насиба Содиқова, муовини раиси Кумитаи Маҷлиси намояндагон оид ба қонунгузорӣ ва ҳуқуқи инсон, зимни баррасии лоиҳаи Қонуни Ҷумҳурии Тоҷикистон «Оид ба ворид намудани илова ба Қонуни Ҷумҳурии Тоҷикистон «Дар бораи рӯзҳои ид», зикр сохт, ки лоиҳаи қонун бо тартиби ҳуқуқи ташаббуси қонунгузорӣ аз ҷониби Ҳукумати Ҷумҳурии Тоҷикистон пешниҳод шудааст.
Ба андешаи Зафар Исмоилзода, вакили Маҷлиси намояндагон, лоиҳаи мазкур хеле зарур ва саривақтист, зеро мо бояд бо тарҳрезии тадбирҳои мушаххас тамаддуни худро ҳифз намуда, дар ин замина пояи асосии истиқлолият ва ҳувияти миллиро таҳким бахшем. Мавсуф зикр кард, ки имрӯз зери таъсири равандҳои ҷаҳонишавӣ, аз ҷумла тамаддуни ғайр тавассути шабакаҳои интернетӣ ва дигар технологияҳои муосир хатари коста гаштани ин тамаддун ба вуҷуд омадааст. Мо - миллати тамаддунофар бояд дар ин давраи сарнавиштсоз беш аз ҳарвақта масъулиятшиносу ҳушёр буда, пеши ин хатарро гирем ва ба насли оянда муқаддасоти милливу таърихиамонро бо тамоми зебоияш супорем.
Мунаввари САФАР, «Ҷумҳурият»
Баёни ақида (0) Санаи нашр: 26.04.2017 №: 85 Мутолиа карданд: 2969
