порлумон
КОҒАЗҲОИ ҚИМАТНОК БА МАБЛАҒИ 530 МИЛЛИОН СОМОНӢ БА МУОМИЛОТ МЕБАРОЯНД
Вазорати молияи Ҷумҳурии Тоҷикистон коғазҳои қиматноки давлатиро ба маблағи 530 миллион сомонӣ ба муҳлати панҷ сол бо меъёри 2 дарсади солона ба муомилот мебарорад.
Ин матлаб зимни ҷонибдории пешниҳоди Ҳукумати Ҷумҳурии Тоҷикистон «Дар бораи ба муомилот баровардани коғазҳои қиматноки давлатии Ҷумҳурии Тоҷикистон ҷиҳати маблағгузории соҳаи энергетика ва ворид намудани тағйирот ба Қарори Ҳукумати Ҷумҳурии Тоҷикистон аз 12 декабри соли 2016, № 527» баён гардид.
Ҷамшед Нурмуҳаммадиён, муовини вазири молияи Ҷумҳурии Тоҷикистон, гуфт, ки коғазҳои қиматноки ба муомилот баровардашуда, тибқи шартнома ба Ҷамъияти саҳомии кушодаи «Неругоҳи барқи обии Роғун» супурда мешаванд. Бонки миллии Тоҷикистон он векселҳоро қабул намуда, 530 миллион сомониро ба суратҳисоби алоҳидаи ҶСК «Неругоҳи барқи обии Роғун» мегузаронад. Назар ба гуфтаи ӯ, дар ҳолати ризоят додан нисбат ба қарори мазкур Вазорати молия, Бонки миллии Тоҷикистон ва ҶСК «Неругоҳи барқи обии Роғун» нақшаи чорабиниҳоро оид ба маблағгузории ин соҳа ва бозгардондани маблағҳои ҷудошуда таҳия менамоянд.
Зикр гардид, ки тибқи қарори раёсати Бонки миллии Тоҷикистон, аз 24 феврали соли 2017, бозхонд гардидани иҷозатномаҳои Ҷамъияти саҳомии пӯшидаи «Тоҷпромбонк» ва ҶСК «Фононбонк» ба Қарори Ҳукумати Ҷумҳурии Тоҷикистон, аз 12 декабри соли 2016 «Дар бораи ба муомилот баровардани коғазҳои қиматноки давлатии Ҷумҳурии Тоҷикистон барои сармоякунии бонкҳо» тағйироти дахлдор ворид мегардад.
Шариф Раҳимзода, раиси кумитаи Маҷлиси намояндагон оид ба иқтисод ва молия, афзуд, ки ин маблағ аз ҳисоби он маблағҳоест, ки бо қарори Ҳукумати Ҷумҳурии Тоҷикистон қаблан барои маблағгузории соҳаи бонкӣ ҷудо шуда буд.
Мунаввари САФАР, «Ҷумҳурият»
Баёни ақида (0) Санаи нашр: 27.04.2017 №: 86 Мутолиа карданд: 2988
