маориф
"МУЪМИНОБОД. МАКТАБИ МУСИҚӢ БА ДАСТГИРӢ НИЁЗ ДОРАД"
Мақомоти иҷроияи ҳокимияти давлатии ноҳияи Муъминобод мақолаи «Муъминобод. Мактаби мусиқӣ ба дастгирӣ ниёз дорад» - ро, ки дар рӯзномаи «Ҷумҳурият» 30 марти соли 2017 нашр шудааст, дар маҷлиси назоратӣ – истеҳсолии назди раиси ноҳия бо иштироки муовини якум, муовинон, роҳбари дастгоҳи раиси ноҳия, мудирони шуъба ва бахшҳои мақомоти иҷроияи ҳокимияти давлатӣ, раисони ҷамоатҳои шаҳраку деҳот ва роҳбарони ташкилоту муассисаҳои ноҳиявӣ мавриди баррасӣ қарор дод.
Қайд кардан ба маврид аст, ки мактаби бачагонаи мусиқии ноҳия аз соли 1975 ба фаъолият шурӯъ намуда, то ин давра шумораи зиёди шогирдонро омода намудааст.
Дар мақола дар боби ба талабот ҷавобгӯ набудани бинои мактаби бачагонаи мусиқии ноҳия ва нарасидани созҳои мусиқӣ сухан меравад. Қобили зикр аст, ки дар ин мактаб 3 фортепиано, 6 доира, 4 рубоб, 1 тор, 6 таблак, 1 аккордеон, 4 дутор, 3 ямаха, 4 компютер ва 2 принтер барои дарсазхудкунӣ ва сайқали маҳорат мавҷуд мебошанд. Дар ин даргоҳи ҳунар 15 нафар омӯзгор ба 146 нафар толибилм дарси мусиқӣ меомӯзонанд. Иштироки ҳунаромӯзон дар чорабиниҳои фарҳангии ноҳия ва берун аз он назаррас аст.
Мактаби мусиқӣ дар бинои алоҳидаи собиқ беморхонаи марказии ноҳия фаъолият дорад.
Мавриди зикр аст, ки соли 2016 Кохи фарҳанг бунёд ёфта, мавриди истифода қарор гирифт. Ба ин васила қисме аз мушкилоти асосии соҳа рафъ гардид.
Мақомоти иҷроияи ҳокимияти давлатии ноҳияи Муъминобод бо истифода аз имкониятҳо кӯшиш ба харҷ медиҳад, ки бо дастгирии мақомоти иҷроияи ҳокимияти давлатии вилояти Хатлон ва Вазорати фарҳанги ҷумҳурӣ дигар мушкилоти ҷойдоштаро низ бартараф намояд.
Л. ШАРИФЗОДА,
муовини раиси ноҳияи Муъминобод
Баёни ақида (0) Санаи нашр: 23.05.2017 №: 103 Мутолиа карданд: 1549
