порлумон
МУҲИТИ ЗИСТ. ҚОНУНИ НАВ БА ТАСВИБ РАСИД
Ҷумҳурии Тоҷикистон ҳамчун узви ҷомеаи ҷаҳонӣ дар баррасии масъалаҳои экологӣ дар сатҳи байналмилалӣ фаъолона ширкат намуда, барои мутобиқ намудани қонунгузории миллӣ бо меъёрҳои байналмилалӣ дар ин самт пайваста иқдомоти судманд ба роҳ мемонад.
Дар ин робита, Маҷлиси намояндагони Маҷлиси Олӣ лоиҳаи Қонуни Ҷумҳурии Тоҷикистон «Дар бораи арзёбии таъсиррасонӣ ба муҳити зист»-ро баррасӣ намуда, оид ба қабули он қарори дахлдор ба тасвиб расонд. Хайрулло Ибодзода, раиси Кумитаи ҳифзи муҳити зисти назди Ҳукумати Ҷумҳурии Тоҷикистон, лоиҳаи қонунро дар ҳузури вакилон муаррифӣ намуда, аз ҷумла иброз дошт, ки қабули қонун метавонад барои рушди соҳаи ҳифзи муҳити зист, истифодаи оқилонаи сарватҳои табиӣ, арзёбии таъсиррасонӣ ба муҳити зист бо ҷалби иштироки ҷомеаи шаҳрвандӣ фаъолона мусоидат намояд, ки он асоси сиёсати давлатии ҳифзи табиатро ташкил медиҳад.
Назар ба гуфтаи мавсуф, дар ибтидои соли 2016 аз ҷониби СММ барои 15 соли оянда ҳадафҳои асосӣ муайян гардид, ки бархе аз онҳо ба масоили экологӣ робитаи бевосита доранд. Яке аз ин ҳадафҳо чораҷӯии фаврӣ барои пешгирии шиддати тағйирёбии иқлим ва бартараф намудани оқибатҳои он мебошад.
Олимҷон Сафаров, вакили Маҷлиси намояндагон, зимни барррасии лоиҳаи қонуни мазкур иброз дошт, ки он асосҳои ҳуқуқӣ ва ташкилии арзёбии таъсиррасонӣ ба муҳити зист, робитаи мутақобилаи он ба экспертизаи давлатии экологӣ, инчунин, баҳисобгирӣ ва таснифи объектҳои арзёбии таъсиррасонӣ ба муҳити зистро муқаррар менамояд. Дар идома таъкид шуд, ки дар давраи амалӣ намудани ҳадафи асосӣ инсоният метавонад, ба муҳити зист таъсири манфии худро расонад. Аз ин лиҳоз баҳисобгирии зарари экологӣ дар рафти қабули қарори ҳанӯз дар марҳилаи банақшагириву лоиҳакашӣ қарордошта метавонад, барои пешгирии таъсири манфӣ ба муҳити зист мусоидат намояд. Ин нисбат ба чорабиниҳое, ки дар ҷараёни истихроҷи захираҳои табиӣ, корҳои сохтмонӣ ва ё баъд аз ба истифода супурдани объектҳои соҳаи истеҳсолӣ барои ҷуброн кардан ва додани товони зарар аз рӯи арзёбии иқтисодӣ бештар манфиатдор, яъне арзонтар мебошад.
Мунаввари САФАР, «Ҷумҳурият»
Баёни ақида (0) Санаи нашр: 13.06.2017 №: 124 Мутолиа карданд: 3156
