мулоқотҳо
МУЛОҚОТИ ПЕШВОИ МИЛЛАТ БО ҲАЙАТИ ШӮРОИ ДИРЕКТОРОНИ БОНКИ ОСИЁИИ РУШД
19 июн дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳайати Шӯрои директорони Бонки Осиёии Рушдро ба ҳузур пазируфтанд.
Дар мулоқот ҳолати кунунӣ ва дурнамои ҳамкории молиявии Тоҷикистон ва Бонки Осиёии Рушд мавриди баррасӣ қарор дода шуд.
Сарвари давлат Эмомалӣ Раҳмон аз ҳамкории мутақобилаи Ҷумҳурии Тоҷикистон ва Бонки Осиёии Рушд дар давоми 20 соли охир изҳори қаноатмандӣ намуда, таъкид доштанд, ки дар ин давра аз ҷониби бонки мазкур соҳаҳои гуногуни иқтисодӣ ва иҷтимоии Тоҷикистон дар ҳаҷми беш аз 1,5 миллиард доллари амрикоӣ маблағгузорӣ шуда, Бонки Осиёии Рушд ба калонтарин шарики рушди мамлакат табдил ёфтааст.
Ҷонибҳо ҳамкориҳои Тоҷикистон бо Бонки Осиёии Рушдро дар соҳаҳои энергетика, нақлиёт ва мусоидат ба таъмини амнияти озуқаворӣ аз самтҳои афзалиятнок дар ҳамгироиҳои минбаъда арзёбӣ намуда, истифодаи пурраи имкониятҳои истифоданашударо барои беҳбудии равобити дуҷониба муҳим шумурданд.
Дастгирӣ намудани лоиҳаҳои инфрасохтори нақлиётии барои рушди тиҷорати минтақавӣ аҳамиятдошта, аз ҷумла таҷдиди марҳалаи аввали қитъаи роҳи Оби Гарм – Роғун - Нурободи нави шоҳроҳи автомобилгарди Ваҳдат – Рашт - сарҳади Қирғизистон (Ваҳдат - Қарамиқ), лоиҳаи таҷдиди Неругоҳи барқи обии Норак, ҳамкорӣ дар татбиқи дигар лоиҳаҳои энергетикии Тоҷикистон, ки дар таҳқими иқтидори истеҳсолию интиқоли неруи барқ, ки дар тавсеаи ҳамкориҳои минтақавӣ ва таъмини суботи сиёсиву иҷтимоии минтақа нақши калон доранд, ҷалби маблағҳои иловагӣ дар бартарафсозии оқибатҳои ногувори офатҳои табиӣ дар минтақаҳои гуногуни Тоҷикистон ва ҳалли масъалаҳои марбут ба суботи молиявӣ ва мувозинати буҷет, ки Ҷумҳурии Тоҷикистон ба он ниёз дорад, аз самтҳои нав ва барои ҳар ду ҷониб манфиатбори ҳамкориҳо маънидод гардид.
Изҳори бовар карда шуд, ки бо талошҳои муштарак дар татбиқи ҳадафҳои дуҷониба ва тақвияти боз ҳам бештари муносибатҳои Тоҷикистон ва Бонки Осиёии Рушд муваффақият ба даст оварда мешавад.
Баёни ақида (0) Санаи нашр: 20.06.2017 №: 130 Мутолиа карданд: 2166
