мулоқотҳо
МУЛОҚОТ БО ВАЗИРОНИ КОРҲОИ ДОХИЛИИ ДАВЛАТҲОИ АЪЗОИ ИДМ
Имрӯз дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вазирони корҳои дохилии давлатҳои аъзои Иттиҳоди Давлатҳои Мустақилро, ки бо мақсади иштирок дар ҷаласаи Шӯрои вазирони корҳои дохилии Иттиҳоди Давлатҳои Мустақил ба Тоҷикистон ташриф овардаанд, барои мулоқот ба ҳузур пазируфтанд.
Президенти мамлакат Эмомалӣ Раҳмон вазирони кишварҳои аъзоро ба Тоҷикистон хайрамақдам гуфта, ба кори ҷаласаи Шӯрои вазирон натиҷаҳои бобарор орзу карданд.
Дар ҷараёни суҳбат масъалаҳои амнияти минтақавӣ ва байналмилалӣ, ҳамкории зич ва самаранок байни сохторҳои дахлдори Ҷумҳурии Тоҷикистон ва дигар ҷумҳуриҳои аъзои Иттиҳоди Давлатҳои Мустақил дар мубориза бар зидди терроризм, экстремизм, ҷиноятҳои муташаккили трансмиллӣ, гардиши маводи мухаддир ва пешгирии шомилшавии шаҳрвандон ба гурӯҳҳои ифротӣ баррасӣ шуданд.
Таъкид гардид, ки дар давраи ҷаҳонишавӣ ва вазъи зудтағйирёбандаи олам бояд сохторҳои дахлдори кишварҳои аъзо дар доираи ҳамкории дастаҷамъона ва огоҳона дар чаҳорчӯби иттиҳод барои пешгирии таҳдиду хатарҳои ҷаҳони муосир тадбирҳои муштарак андешанд ва бар зидди онҳо муқовимати шадиду оштинопазир нишон диҳанд.
Ҳамчунин, зимни мулоқот зикр гардид, ки татбиқи санадҳои меъёрии ҳуқуқии дар доираи иттиҳод қабулгардида, гузарондани чорабиниҳои фаврӣ - профилактикӣ, табодули иттилоот, тайёр кардани кадрҳои баландихтисоси мақомоти ҳифзи ҳуқуқу тартибот ва баланд бардоштани сатҳи касбияти кормандони ин сохторҳо барои таъмини амнияту субот дар ҷомеа мусоидат менамоянд.
Дар ҷараёни мулоқот дигар масъалаҳои судманди ҳамкорӣ дар доираи Иттиҳоди Давлатҳои Мустақил баррасӣ шуданд.
Баёни ақида (0) Санаи нашр: 28.06.2017 №: 134-135 Мутолиа карданд: 2519
