маориф
ТАЪМИРИ МАКТАБҲО АЗ ҲИСОБИ БУҶЕТ
Рустами Эмомалӣ, раиси шаҳри Душанбе, роҳбарони ноҳияҳо ва дигар масъулини соҳаи маорифи шаҳрро вазифадор намуд, ки таъмиру тармими мактабҳо, кӯдакистонҳо ва боғчаҳои кӯдаконро тибқи қонунгузории ҷорӣ роҳандозӣ намуда, то 1 августи соли равон оид ба корҳои дар ин самт баанҷомрасида маълумот диҳанд.
- Солҳои қаблӣ, бо вуҷуди хилофи қонун будани ҷамъоварии маблағ аз хонандагон барои таъмиру тармими муассисаҳои таълимӣ, дар аксар таълимгоҳҳои пойтахт ҳолати мазкур ба мушоҳида мерасид. Омӯзгорони мактабу кӯдакистонҳо аз моҳҳои марту апрел ба маъракаи пулҷамъкунӣ шурӯъ намуда, дар давраи таътили тобистона корҳои таъмиру тармими муассисаҳои мазкурро ба роҳ мемонданд, - гуфт Муҳаммадалӣ Азизӣ, сардори сарраёсати маорифи шаҳри Душанбе.
- Бо мақсади иҷрои супориши раиси шаҳри Душанбе оид ба манъ намудани ҷамъоварии маблағ барои тармиму таъмири мактабҳо ва боғчаҳои кӯдакон аз ҳисоби волидон дар муассисаҳои таҳсилоти миёнаи умумии чор ноҳияи шаҳр комиссия ташкил намуда, бо падару модарон ва омӯзгорон вохӯриҳо гузарондем, ба волидон мазмуну муҳтавои супориши роҳбарияти шаҳрро фаҳмондем. Иқдом аз ҷониби падару модарон хуш истиқбол шуд. Инчунин, омӯзгорон аз сарбории зиёдатӣ, ки назди волидон доштанд, озод шуданд, - афзуд мавсуф.
Супориши раиси шаҳр дар мавриди қатъиян манъ намудани ҷамъоварии маблағ барои тармиму таъмири мактабҳо ва боғчаҳои кӯдакон аз падару модарони хонандагон боиси қаноатмандии сокинони пойтахт гардида, ҳамовозии зиёд пайдо кард. Солҳо боз ин масъала дар ВАО баррасӣ мегардид, аммо роҳи ҳалли худро намеёфт.
Шаҳбоз АБРОР, «Ҷумҳурият»
Баёни ақида (0) Санаи нашр: 29.06.2017 №: 136 Мутолиа карданд: 1965
