маориф
СТИПЕНДИЯИ РАИСИ ШАҲРИ ДУШАНБЕ ТАЪСИС ЁФТ
Бо мақсади татбиқи босамари нақшаю барномаҳои амал бахшида ба Соли ҷавонон эълон гардидани соли 2017 қарори раиси шаҳри Душанбе Рустами Эмомалӣ, дар бораи таъсис додани стипендияи раиси шаҳри Душанбе ба тасвиб расид. Маблағи ҳармоҳаи стипендия 250 сомонӣ буда, он дар нуҳ моҳи соли хониш ба 200 нафар хонандагону донишҷӯёни беҳтарини муассисаҳои таҳсилоти умумӣ, ибтидоӣ ва миёнаи касбии шаҳри Душанбе дода мешавад. Ҳамзамон, бо ҳамин қарор низомномаи стипендияи раиси шаҳри Душанбе, ки пешбарӣ, озмун, комиссия, тарзи санҷиш ва ҷузъиёту муқаррароти дигари додани стипендияро фаро мегирад, тасдиқ гардид.
Раёсати кор бо ҷавонон ва варзиши шаҳри Душанбе ҳамоҳангсози асосии амалигардонии қарор муқаррар гардида, назорати иҷрои он ба зиммаи муовини раиси шаҳри Душанбе, ваҷҳҳои дигари татбиқи қарор бар дӯши раёсату шуъбаҳои дастгоҳи раиси шаҳр ва мақомоти иҷроияи ҳокимияти давлатии шаҳри Душанбе гузошта шудаанд.
Тавре аз раёсати иттилоот ва робитаҳои хориҷии дастгоҳи раиси шаҳри Душанбе ба «Ҷумҳурият» хабар доданд, ҳадаф аз ин иқдом мусоидат ба таълиму тарбияи беҳтари наврасону ҷавонон, ҳавасманд намудани онҳо ба омӯзиши асосҳои илму техникаи муосир ва татбиқи босамари нақшаю барномаҳои ба ифтихори Соли ҷавонон роҳандозишуда мебошад.
С. АЗИЗӢ, «Ҷумҳурият»
Баёни ақида (0) Санаи нашр: 30.06.2017 №: 137 Мутолиа карданд: 2684
