ҳуқуқ
ҚОЧОҚ. ПЕШГИРӢ ВА МАРГИ ДУ ҶИНОЯТПЕША
Хизматчиёни ҳарбии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон 3 - юми июли соли ҷорӣ аз вуруди ғайриқонунии қочоқчиёни мусаллаҳ тавассути ду нуқтаи сарҳадӣ ба хоки Тоҷикистон ҷилавгирӣ карданд.
Дар ин бора Муҳаммад Улуғхоҷаев, роҳбари маркази матбуоти Қӯшунҳои сарҳадии Кумитаи давлатии амнияти миллӣ, ба “Ҷумҳурият” хабар дод. Бино ба маълумоти ӯ, нахуст кӯшиши убури ғайриқонунӣ ва интиқоли маводи мухаддир аз Ҷумҳурии Исломии Афғонистон ба Ҷумҳурии Тоҷикистон бар пояи маълумоти оперативӣ дар яке аз минтақаҳои дидбонгоҳи тобеияти Отряди сарҳадии “Панҷ” пешгирӣ шудааст. Зимни гузарондани амалиёт қочоқчиёни мусаллаҳ ба амри хизматчиёни ҳарбии Қӯшунҳои сарҳадӣ итоат накарда, ба сӯи онҳо оташ кушоданд, ки мунҷар ба даргирии мусаллаҳона гардид. Баъд аз фирори қочоқчиён ба тарафи Афғонистон аз ҷойи ҳодиса тақрибан 16 килограмм маводи мухаддири навъи ҳашиш, як адад яроқи оташфишони АКМ 74, як адад тирдон бо тирҳояш дарёфт ва мусодира шуд.
Айни чунин ҳодиса дар нимашаби ҳамон рӯз дар минтақаи тобеияти Отряди сарҳадии “Ҳамадонӣ” рух дод, вале ин шабохун бо марги қочоқбарон анҷом шуд. Дар натиҷаи амалиёти марзбонон ду қочоқчии шахсияташ номаълум безарар ва дигар аъзои гурӯҳ ба хоки Афғонистон паноҳ бурданд.
Бино ба иттилои манбаъ, вобаста ба ҳар ду ҳолат аз ҷониби раёсати Кумитаи давлатии амнияти миллии Ҷумҳурии Тоҷикистон дар вилояти Хатлон тафтишот идома дорад.
Ф.ҶУМЪАЕВ, “Ҷумҳурият”
Баёни ақида (0) Санаи нашр: 07.07.2017 №: 142 Мутолиа карданд: 1106
