ҳуқуқ
МАЪРИФАТИ ҲУҚУҚӢ. ТАҲЛИЛҲО НИШОН МЕДИҲАНД...
Таҳлил ва ҷамъбасти шашмоҳаи аввали соли равон нишон дод, ки прокуратураи вилояти Хатлон ба масъалаи баланд бардоштани сатҳи маърифати ҳуқуқии аҳолӣ таваҷҷуҳи хос зоҳир намуда, бо андешидани тадбирҳои муассир дар ин самт ба натиҷаҳои назаррас ноил гардидааст.
Кормандони прокуратураи вилоят дар асоси нақша-чорабиниҳои таҳия ва тасдиқшуда барои дар сатҳи зарурӣ баланд бардоштани маърифати ҳуқуқии аҳолӣ 1967 суҳбату вохӯрӣ гузаронда, тавассути воситаҳои ахбори омма оид ба натиҷаи санҷишҳои прокурорӣ ва тафтиши парвандаҳои ҷиноятии аҳамияти ҷамъиятидошта 431 маротиба баромад карданд. Мавзӯъҳои мубориза бар зидди терроризм ва экстремизм, коррупсия, гардиши ғайриқонунии маводи мухаддир, моддаҳои психотропӣ ва прекурсорҳо, танзими анъана ва ҷашну маросимҳои миллӣ, масъулияти падару модар дар таълиму тарбияи фарзанд, иҷрои қонунгузории андоз, хусусигардонии моликияти давлатӣ, ҷиноятҳои одамфурӯшӣ ва одамрабоӣ, пешгирии ҷинояткорӣ дар байни ноболиғон, қонунгузориҳои замин дар меҳвари фаъолияти прокурорҳои шаҳру навоҳии вилоят қарор доштанд.
Вобаста ба иҷрои банди 4-и нақшаи Прокуратураи генералӣ дар доираи нуктаҳои Паёми навбатии Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ бо иштироки кормандони дастгоҳи марказии прокуратураи вилоят ва прокурорҳои шаҳру ноҳияҳо корҳои зиёде анҷом дода шуданд. Аз ҷумла бо мақсади пешгирии ҷинояткорӣ дар ҷомеа, бавижа ҷиноятҳои вобаста ба ришваситонӣ, даҳшатафканӣ ва ифротгароӣ, шомилшавиии ҷавонон ба ҳизбу ҳаракатҳои экстремистӣ ва террористӣ, иштирок дар задухӯрдҳои мусаллаҳонаи кишварҳои хориҷӣ бо ширкати доираи васеи аҳолӣ, махсусан ҷавонон, ҳамоишҳо доир гашта, тавассути барномаҳои телевизионҳои марказӣ ва вилоятӣ намоиш дода шуданд. Гузашта аз ин, кормандони дастгоҳи марказии прокуратураи вилоят ба мардум моҳияти «Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои солҳои 2016-2020», «Стратегияи миллии Ҷумҳурии Тоҷикистон оид ба мубориза ба муқобили ҷиноятҳои коррупсионӣ барои солҳои 2013-2020» ва дигар санадҳои меъёрии ҳуқуқии амалкунандаро мунтазам мефаҳмонанд.
Таҳлилҳо нишон медиҳанд, ки маҳз дар натиҷаи роҳандозии саривақтии корҳои таблиғотию ташвиқотӣ, ба мардум фаҳмондани вижагиҳои қонунҳои амалкунанда содиршавии ҷиноят аз ҷониби сокинони вилоят дар дохил ва хориҷи кишвар сол ба сол коҳиш ёфта истодааст.
Прокуратураи вилояти Хатлон минбаъд низ баҳри баланд бардоштани сатҳи маърифати ҳуқуқии аҳолӣ ва иҷрои Фармони Президенти Ҷумҳурии Тоҷикистон муҳтарам Эмомалӣ Раҳмон аз 9 апрели соли 1997, таҳти № 691 «Дар бораи сиёсати ҳуқуқӣ ва таъмини тарбияи ҳуқуқии шаҳрвандони Ҷумҳурии Тоҷикистон» ва дигар санадҳои зерқонунии он чораҳои амалиро пиёда хоҳад кард.
Варқаи ЗАЙНИДДИН,
ёрдамчии калони прокурори вилояти Хатлон,
мушовири адлияи дараҷаи 1
Баёни ақида (0) Санаи нашр: 10.07.2017 №: 143 Мутолиа карданд: 1207
