ҳуқуқ
"НАЙРАНГИ ЯК КОРФАРМО". БАЪД АЗ ЧОПИ МАТЛАБИ "ҶУМҲУРИЯТ" ҚАРЗИ МУЗДИ МЕҲНАТ ПАРДОХТ ШУД
Прокуратураи ноҳияи Зафаробод матлаби рӯзномаи «Ҷумҳурият» (№114 - 117, 03 июни соли 2017) таҳти унвони «Найранги як корфармо» - ро мавриди баррасӣ қарор дода, оид ба далели пешовардаи муаллифи матлаб М. Кенҷаев, сокини шаҳраки Ғончии ноҳияи Деваштич, санҷиш гузаронд.
Дар рафти санҷиш муайян гардид, ки маблағи иҷрои корҳои тибқи созишнома анҷомдодаи шаҳрванд М.Кенҷаев оид ба кандану васл кардани қубурҳои обгузар дар ҳудуди Ассотсиатсияи истифодабарандагони оби ба номи «50 - солагии Зафаробод»-и Ҷамоати деҳоти Равшани ноҳияи Зафаробод дар ҳаҷми 40 000 сомонӣ аз ҷониби раиси ассотсиатсия М.Назаров бо сабаби мушкили молиявӣ аз моҳи апрели соли 2016 инҷониб пардохт нагардида буд.
Бо дахолати прокуратураи ноҳия маблағи мазкур пурра ба манфиати шаҳрванд М.Кенҷаев пардохт шуда, аз тарафи номбурда бо назардошти тариқи мусбат ҳал гардидани масъала ба прокуратураи ноҳия сипосномаи хаттӣ ворид гардид.
А. СУЛТОНЗОДА,
прокурори ноҳияи Зафаробод, мушовири адлияи дараҷаи 1
PS. Ёдовар мешавем, ки Меҳроҷ Кенҷаев, сокини шаҳраки Ғончии ноҳияи Деваштич, дар номааш ба унвонии «Ҷумҳурият» навишта буд, ки дар асоси як қарордод бо Меҳроҷ Назаров, раиси Ассотсиатсияи истифодабарандагони оби ба номи «50 - солагии Зафаробод»-и Ҷамоати деҳоти Равшани ноҳияи Зафаробод, давоми ду моҳ дар масофаи 2,5 километр қубурҳои обгузареро, ки истифода намешуданд, кофта, корҳои заруриро анҷом додаанд. - Ба қубурҳое, ки мо васл карда будем, об омад ва замин обёрӣ шуда истодааст. Аммо беш аз як сол аст, ки мо музди меҳнату хароҷотамонро гирифта наметавонем. Аз ин рӯ, зарур шумурдам, ки ба рӯзномаи «Ҷумҳурият» муроҷиат намоям, - навишта буд Меҳроҷ Кенҷаев.
Баёни ақида (0) Санаи нашр: 20.07.2017 №: 151 Мутолиа карданд: 1299
