туризм
САЙЁҲИИ ЭКОЛОГӢ. ИМКОНОТ ВА МУШКИЛОТ
Солҳои охир байни навъҳои сершумори сайёҳӣ экотуризм афзалияти бештар пайдо кард. Бо назардошти аҳамияти хоси соҳа солҳои охир дар ҷумҳурӣ марказҳои нави сайёҳӣ ташкил шуда, рушд меёбанд. Марказҳои куҳна таҷдиду барқарор ва шумораи парваришгоҳҳо, боғҳои миллӣ, мавзеъҳои фарҳангиву тамошобоб сол ба сол зиёд мешаванд. Шумораи сайёҳоне, ки ба тамошои чунин ҷойҳои шоёни таваҷҷуҳ ва аҷоиби табиат мароқ доранд, беш аз пеш меафзояд.
Минтақаҳои кӯҳистони Тоҷикистон дорои неруи ғании сайёҳӣ буда, қисми ҷудонашавандаи раванди ҷаҳонии сайёҳӣ ба шумор мераванд. Вале дар онҳо нисбат ба дигар минтақаҳои кӯҳии Осиёи Марказӣ сайёҳӣ камтар рушд ёфтааст. Минтақаҳои гуногуни кӯҳистони Тоҷикистон, аз ҷумла кӯҳҳои Фон, кӯлҳои Аловиддин, Искандаркӯл, Кӯли калон, Чуқурак, Бибиҷаннат, ҳафткӯли дараи Шинг, ағбаҳои Аловиддин, Лодан, Зурмеч, мамнӯъгоҳҳои «Бешаи палангон», «Ромит», дараи Варзоб, Боғи ботаникии «Бадахшон», кӯлҳои Сарез, Қарокӯл, Рангкӯл, Зоркӯл, Булункӯл, Яшилкӯл, Тузкӯл барои рушди сайёҳии экологӣ мусоид мебошанд. Алҳол ба ин минтақаҳо аз гӯшаҳои гуногуни кишвар ва ҷаҳон сайёҳон ташриф меоранд. Мавриди таваҷҷуҳ қарор гирифтани табиати минтақаҳои кӯҳистони Тоҷикистон дар он аст, ки дар ин ҷо кӯҳҳои сарбафалаккашида, пиряхҳои азим, намудҳои сершумори набототу ҳайвонот, обҳои мадании хунуку гарм, ёдгориҳои таърихӣ – фарҳангӣ ва ҳудудҳои махсус муҳофизатшаванда мавҷуданд.
Сайёҳии экологӣ намуди махсуси фаъолият буда, ба гирифтани фоида ва гузоштани саҳм дар ҳифзи системаи экологӣ бо риояи ҳатмии қоидаҳо ва урфу одатҳои халқҳои маҳаллӣ равона шудааст. Дар ҳоли имрӯз мушкилоти асосии сайёҳии экологӣ хизматрасонӣ ва меҳмоннавозӣ ба шумор меравад. Доираи касбу коре, ки барои соҳаи экотуризм хос аст, ниҳоят васеъ мебошад. Хусусиятҳои асосии барои шахсони дар соҳаи экотуризм шуғлдошта ин муносибати доимӣ бо одамон аст. Аз ин лиҳоз, нафарони дар соҳаи мазкур фаъолиятбаранда бояд таҳаммулпазир, хушмуомила, хайрхоҳ ва боэътимод бошанд ва забонҳои хориҷиро донанд.
Дар бозори байналмилалии сайёҳӣ хизматрасонии сифатнок ба сайёҳон муҳим арзёбӣ мешавад. Бинобар ин, сифат ва фарҳанги хизматрасонӣ дар рушди сайёҳӣ «аслиҳа» - и пурқувват ба шумор меравад.
Шарифхон ТИЛЛОЕВ, рӯзноманигор
Баёни ақида (0) Санаи нашр: 08.08.2017 №: 166 Мутолиа карданд: 2785
