маориф
ЛИБОСҲОИ МАКТАБӢ. СОҲИБКОРОНИ ВАТАНИРО ДАСТГИРӢ МЕБОЯД!
Дар арафаи соли нави хониш дар назди Иттиҳодияи истеҳсолии «Нассоҷии тоҷик», корхонаҳои «Гулистон», «Даҳбед - Д», «Ресандаи Қӯрғонтеппа», «Нассоҷии Хуҷанд», «Олимхони Хуҷандӣ» ва «Коргоҳи дӯзандагӣ» ба таври доимӣ намоиш - фурӯши либосҳои мактабӣ ташкил гардидааст.
Дар корхонаи «Гулистони Душанбе» бо иштироки хонандагону омӯзгорон таҳти унвони «Интихоби ман - маҳсулоти ватанӣ» намоиш – фурӯши либосҳои мактабӣ доир гардид. Инчунин, дар шаҳру ноҳияҳои Хуҷанд, Исфара, Бобоҷон Ғафуров, Конибодом ва Панҷакенти вилояти Суғд аз ҷониби корхонаҳои дӯзандагӣ чунин ярмаркаҳои фурӯши либоси мактабӣ ташкил карда шуданд. Ҳамзамон, дар чунин ярмаркаҳо аз ҷониби корхонаҳои дӯзандагӣ ба зиёда аз 500 ятими кулл ва аз оилаҳои камбизоат сару либоси мактабӣ ройгон тақдим гардид.
Аз мушоҳидаҳо бармеояд, ки солҳои охир сифати дӯхти либоси мактабии истеҳсоли корхонаю коргоҳҳои ватанӣ беҳтар гардида, нархи онҳо нисбат ба маҳсулоти воридотӣ арзонтар шудааст. Тибқи маълумоти оморӣ, ҳоло дар миқёси ҷумҳурӣ зиёда аз 40 корхонаю коргоҳ ба дӯхти либоси мактабӣ машғул буда, барои истеҳсоли маҳсулот дастгоҳу таҷҳизоти ҳозиразамон васлу насб кардаанд. Давоми ҳафт моҳи соли равон аз ҷониби корхонаҳои соҳа қариб 300 ҳазор либоси мактабӣ истеҳсол карда шудааст. Дар зиёд гардидани ҳаҷми истеҳсоли маҳсулот саҳми корхонаҳои ИИ «Нассоҷии тоҷик» - и шаҳри Душанбе, «Даҳбед - Д» - и шаҳри Ҳисор, «Чевар - 2014», «Зуҳал - 2014» - и ноҳияи Рашт, «Гулдаст - 2015» - и шаҳри Конибодом, «Ҳусния - Б» - и ноҳияи Ҷ. Расулов, «Олимхони Хуҷандӣ» - и шаҳри Хуҷанд, «Коргоҳи дӯзандагӣ» - и шаҳри Қӯрғонтеппа, «Сабр - 2016», «Каёнуш» - и ноҳияи Данғара, «Сомон - 2013» - и ноҳияи Ҷ. Балхӣ, «Субҳи Сарбанд» ва «Бофандаи Норак» назаррас аст. Тавассути ташкили чунин ярмаркаҳои фурӯши либоси мактабӣ хонандагони муассисаҳои таълимӣ маҳсулоти хушсифату арзон мехаранд.
Шаҳбоз АБРОР, «Ҷумҳурият»
Баёни ақида (0) Санаи нашр: 25.08.2017 №: 181 Мутолиа карданд: 2443
