маориф
МАОРИФ.
ДАСТОВАРД ВА МУШКИЛОТИ ОН ДАР ТОҶИКОБОД
- Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаи маориф таваҷҷуҳи зиёд доранд ва пайваста таъкид менамоянд, ки Ҳукумати кишвар барои пешрафти илму маориф аз тамоми имкониятҳо истифода мебарад. Маҳз натиҷаи ғамхории Ҳукумати кишвар ва Пешвои миллат аст, ки новобаста аз мушкилоти иқтисодӣ ва буҳрони молиявие, ки ҳоло тамоми ҷаҳон ба он рӯ ба рӯст, маблағгузории соҳа сол аз сол афзун мегардад, - гуфт Нодираи Маҳмадисо, раиси ноҳияи Тоҷикобод, зимни баргузории ҷаласаи машварати августии омӯзгорони ноҳия.
Мирзомудин Носиров, мудири маорифи ноҳия, оид ба дастовардҳои соҳа суханронӣ намуда, аз ҷумла гуфт, ки дар замони соҳибистиқлолии кишвар, шумораи муассисаҳои таълимӣ афзуда, аз 37 ба 43 адад расид. Бо дастгирии Ҳукумати кишвар дар назди муассисаҳои таълимии рақамҳои 5, 6, 8, 9, 11, 15, 17 биноҳои иловагӣ сохта ба истифода дода шуданд. Ҳоло сохтмони биноҳои иловагӣ дар назди муассисаҳои таълимии № 27 ва 12 идома дорад.
Дар ҷаласа, ҳамчунин, зикр шуд, ки имсол бо дастгирии Вазорати маориф ва илми Ҷумҳурии Тоҷикистон бинои дуошёнаи собиқ хоҷагии «Ҳаёти нав» ба тавозуни муассисаи таълимии № 10 гузаронда шуд. Таъмиру азнавсозии он аллакай оғоз гардидааст. Аз ҳисоби маблағҳои буҷети ноҳия муассисаи таълимии № 18 низ аз таъмири асосӣ бароварда шуд. Дар маркази ноҳия бо дастгирии сафорати Амрико бо маблағи зиёда аз 4 миллион сомонӣ сохтмони Маркази инкишофи кӯдакон бо фарогирии 303 нафар оғоз гардидааст. Тибқи нақша дар ноҳия бояд бинои шуъбаи маориф, мактаби мусиқӣ барои 180 нафар ва муассисаи таълимии № 1 сохта шаванд.
Масъалаи бо кадрҳои соҳибмаълумот таъмин намудани муассисаҳои таълимии ноҳия аз ҳисоби хатмкардагоне, ки тибқи Квотаи президентӣ таҳсил намудаанд ва хатмкардагони Донишкадаи омӯзгории Тоҷикистон дар ноҳияи Рашт то андозае ҳалли худро пайдо намуд. Ҳоло ҳамаи муассисаҳои таълимии ноҳия бо кадрҳои соҳибмаълумот таъмин мебошанд.
Набудани синфхонаҳои фаннӣ, тахтаҳои электронӣ ва дастрасӣ ба интернет, мавҷуд набудани муассисаҳои томактабӣ дар деҳот, ба стандартҳои ҷаҳонӣ мувофиқ набудани баъзе синфхонаҳо аз мушкилоти асосии соҳа арзёбӣ гардиданд.
Дилшод АМИРОВ, «Ҷумҳурият»
Баёни ақида (0) Санаи нашр: 6.09.2017 №: 188 Мутолиа карданд: 2547
