маориф
ТОҶИКОБОД.
АВЛАВИЯТ БА КАСБОМӮЗӢ
Хонандагону омӯзгорони муассисаи таҳсилоти умумии № 8-и деҳаи Сари пули ноҳияи Тоҷикобод дар арафаи 26 - умин солгарди Истиқлолияти давлатӣ туҳфаи муносиб гирифтанд. Ин ҷо бинои устохона дар ҳаҷми се синфхона барои машғулиятҳои таълими меҳнат ва касбомӯзӣ, аз қабили коркарди чӯб, дӯзандагӣ ва хӯрокпазӣ мавриди истифода қарор гирифт.
Бино аз тарафи Фонди рушди Тоҷикистон ва Агроаксияи Олмон бо маблағгузории бештар аз 702 ҳазор сомонӣ бунёд ёфтааст.
Дар ҳар як синфхона барои 25 нафар таҷҳизоти зарурӣ фароҳам оварда шудаанд. Аз ҷумла, дар синфхонаи дуредгарӣ асбобҳои барқӣ ва дастии коркарди чӯб, дар синфхонаи хӯрокпазӣ лавозимоти пухту паз ва дар синфхонаи дӯзандагӣ мошинаҳои дарздӯзӣ ва дигар таҷҳизоти зарурӣ муҳайё гардидаанд, ки дар як вақт дар ҳар синфхона то 25 нафар ба таълим фаро гирифта мешавад. Дар ҳама синфхонаҳо проекторҳо насб гардида, тавассути онҳо маълумоти зарурӣ ва расму видеоҳо вобаста ба касбҳо ба хонандагон пешниҳод карда мешаванд. То бунёди устохона бо маблағгузории Агроаксияи Олмон омӯзгорони фанни таълими меҳнат дар дигар минтақаҳои ҷумҳурӣ курсҳои омӯзиширо хатм карда, соҳиби малака гардиданд
Сохтмони бино моҳи июли соли 2016 оғоз гардида, аз тарафи ҶДММ - и «Соҳибкор» бо ҷалби сохтмончиёни маҳаллӣ бо сифати баланд сохта ба истифода дода шуд.
Ба муносибати ба истифода супурдани бинои устохона дар муассисаи таълимӣ ҷамъомади тантанавӣ баргузор гардид. Дар ин маросим раиси ноҳия Нодираи Маҳмадисо, намояндагони Сафорати Олмон ва Бунёди маблағгузории иҷтимоии Ҷумҳурии Тоҷикистон, волидайн ва хонандагон суханронӣ намуда, бунёди иншооти навро ғамхории навбатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар нисбати соҳибкасб гардидани насли ҷавон маънидод карданд.
Ҷои зикр аст, ки солҳои охир Бунёди маблағгузории иҷтимоии Ҷумҳурии Тоҷикистон бо ҷалби сармояи Созмони ҳамкориҳои Олмон дар назди муассисаҳои таълимии чор деҳаи ноҳия низ биноҳои дуошёнаи таълимӣ сохтаанд, ки имрӯзҳо мавриди баҳрабардорӣ қарор доранд.
Дилшод АМИРОВ, «Ҷумҳурият»
Баёни ақида (0) Санаи нашр: 14.09.2017 №: 193-194 Мутолиа карданд: 2327
