номаҳо
ҲАҚРО БА ҲАҚДОР РАСОНД
Дар асоси Қарори маҷлиси умумии намояндагони колхози ба номи Ленини ноҳияи Москва (ҳозира Мир Сайид Алии Ҳамадонӣ) – и вилояти Хатлон аз 16 феврали соли 1994, таҳти № 01 ва қарори Кумитаи иҷроияи шӯрои депутатҳои халқии Ҷамоати деҳоти «Даштигуло» - и ноҳияи Москва аз 18 феврали соли 1994, таҳти № 8 дар ҳудуди колхози мазкур дар масоҳати 1980 метри мураббаъ бозори колхозӣ кушода шуд. Бинобар сабаби он ки колхозчии пешқадами ноҳия ба ҳисоб мерафтем, роҳбарияти хоҷагӣ ва Ҷамоати деҳоти «Даштигуло» - и ноҳияи Москва бо қадрдонӣ аз меҳнати мо дар ҳаҷмҳои гуногун бароямон қитъаҳои замин ҷудо карда доданд. Инчунин, соли 1994 бинобар вазнин будани шароити зиндагӣ ба мо дастур дода шуд, ки дар қитъаҳои замини мазкур дуконҳои хусусӣ сохта, ба савдои маҳсулоти ниёзи мардум машғул шавем. Ҳамин тавр, аз ҳисоби худамон дуконҳои хусусии тиҷоратӣ бунёд намудем ва аз ҳамон вақт то инҷониб ба фаъолияти соҳибкорӣ машғулем.
Аммо аввалҳои соли 2007 кормандони вақти мақомоти иҷроияи ҳокимияти давлатии ноҳияи Мир Сайид Алии Ҳамадонӣ ва кумитаи идораи замини ноҳия бе ҳеҷ огоҳӣ сохтан, пинҳонӣ қитъаҳои заминро ғайриқонунӣ ба номи шаҳрванд Султоншо Ҳоҷатов ҳуҷҷатгузорӣ намудаанд. Инчунин, кормандони шуъбаи меъморӣ ва шаҳрсозии ноҳия низ лоиҳаи бозорро тарҳрезӣ карда, ба мақомот бо далелҳои беасос пешниҳод сохтаанд. Бинобар ғайриқонунӣ будани амали мазкур мо ба суди иқтисодии вилояти Хатлон муроҷиат кардем. Аммо даъвои моро рад намуданд.
Зарур шумурдем, ки ба Суди Олии иқтисодии Ҷумҳурии Тоҷикистон муроҷиат намоем. Шикояти кассатсионии мо мавриди баррасӣ қарор гирифт. Дар натиҷа ҳалномаи суди иқтисодии вилояти Хатлон бекор карда ва парванда барои баррасии нав дар дигар ҳайат ба ҳамин суд ирсол гардид. Аз ин рӯ, дар симои раиси суди олии иқтисодии Ҷумҳурии Тоҷикистон Мавлуда Қаландарзода аз тамоми кормандони ин ниҳод миннатдорем, ки муроҷиати моро ба инобат гирифта, ба поймол шудани ҳуқуқҳоямон роҳ надоданд. Воқеан, Мавлуда Қаландарзода аз зумраи мансабдорони баландпояи мақомоти судиест, ки нисбат ба ҳеҷ як муроҷиат бепарвоӣ зоҳир намекунад. Ӯ дар як ҳафта ду бор рӯзи қабули шаҳрвандонро ба роҳ мондааст, ки корафтодагонро шахсан қабул карда, дарди дилашонро мешунавад ва барои рафъи мушкилоташон дар доираи қонун тадбирҳои зарурӣ меандешад. Бо истифода аз гӯшаи «Шаҳрванд» - и рӯзномаи бонуфуз ба ин бонуи адолатпеша арзи сипос менамоем.
Бо эҳтиром Мирзоалӣ Дӯстов, Аҳрор Муродов, Соҳибназар Одинаев, Саидшо Муминов, Ҷумъа Носиров, Насрулло Асроров, Абдулмаҷид Сафаров, Муъмин Қурбонов, сокинони ноҳияи Мир Сайид Алии Ҳамадонӣ
Баёни ақида (0) Санаи нашр: 19.09.2017 №: 197 Мутолиа карданд: 2453
