мулоқотҳо
ВОХӮРИИ ЭМОМАЛӢ РАҲМОН БО АХИМ ШТАЙНЕР
20 сентябр дар шаҳри Ню - Йорк дар ҳошияи Иҷлосияи 72 - юми Маҷмаи умумии Созмони Милали Муттаҳид Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мудири Барномаи рушди Созмони Милали Муттаҳид Ахим Штайнер мулоқот намуданд.
Дар вохӯрӣ масъалаи вобаста ба вазъи кунунӣ ва дурнамои ҳамкориҳои Тоҷикистон бо ин ниҳоди бонуфузи Созмони Милали Муттаҳид мавриди баррасӣ қарор дода шуд.
Аз сатҳи имрӯзаи ҳамкориҳои Тоҷикистон бо Барномаи рушди Созмони Милали Муттаҳид изҳори қаноатмандӣ намуда, Сарвари давлат Эмомалӣ Раҳмон ба саҳми барномаи рушд дар ҳалли ниёзмандиҳои кишвари мо баҳои баланд доданд.
Ахим Штайнер аз ташаббусҳои ҷаҳонии Эмомалӣ Раҳмон дар самти ҳалли мушкилоти умдаи замони муосир ёдовар шуда, мавқеи пойдор ва нақши пешоҳангию пешсафии Сарвари давлати тоҷиконро дар амалигардии барномаи Ҳадафҳои Рушди Ҳазорсолаи Созмони Милали Муттаҳид ба таври шоиста арзёбӣ кард.
Ҷонибҳо ба таври муфассал доир ба масоили рӯзмарраю мавриди таваҷҷуҳ, аз қабили иштироки фаъол дар татбиқи лоиҳаҳои хурду бузурги иҷтимоию иқтисодӣ, мусоидат ба иҷрои Ҳадафҳои Рушди Ҳазорсола, Рӯзномаи 2030 ва Стратегияи миллии рушди Ҷумҳурии Тоҷикистон барои давраи то соли 2030, коҳиш додани сатҳи камбизоатӣ, рафъи оқибатҳои офатҳои табиӣ, ҳалли масоили глобалии марбут ба об ва тағйирёбии иқлим, барқарорсозӣ ва рушди инфрасохтори зарурии ҳаёт ва тақвияти ҳамкориҳо дар соҳаи маориф табодули афкор намуданд.
Ҳамфикрии мусоҳибон дар масъалаҳои муҳими дигари ҳамгироиҳои байналмилалӣ, ба монанди мубориза бар зидди терроризм, гардиши ғайриқонунии маводи мухаддир, харидуфурӯши одамон, коррупсия ва ҷиноятҳои муташаккили трансмиллӣ таъкид гашт.
Изҳори боварӣ шуд, ки ҳамдастию муносибатҳои дӯстонаю манфиатбори Тоҷикистон ва Барномаи рушди Созмони Милали Муттаҳид дар оянда низ самимию судманд боқӣ хоҳанд монд.
Баёни ақида (0) Санаи нашр: 21.09.2017 №: 199 Мутолиа карданд: 2458
