номаҳо
БОЙГОНИИ ТАЪРИХ
Нахуст аз тасмимҳои чанд вақти охири рӯзномаи «Ҷумҳурият» истиқбол мегирем, ки чун як нашрияи милливу бонуфузи кишвар дар роҳи худшиносиву худогоҳиҳо қадамҳои устувор мезанад. Эълони озмунҳое дар бобати мавзӯоти муҳим ва симову шахсиятҳои фарзона ин дар навбати аввал арҷгузорӣ ба ганҷинаҳои миллат ва хидматҳои фарзандони миллат мебошад. Албатта, бидуни озмунҳо низ ин нашрия дар фаъолияти худ таҳаввулеро ба вуҷуд оварда истодааст. Саҳифаҳо, гӯшаҳо, рубрикаҳо ва амсоли он бо махсусиятҳои нав (дар навбати аввал рӯзмаррагиву оммавият) симои рӯзномаро тағйир дода, онро ҳамоҳанги замона сохтаанд. Эълони озмунро (дар радифи дигар озмунҳо) ба ваҷҳи гиромидошти забони модарӣ ва хидматҳои қаҳрамонони Тоҷикистон дар ин самт аз ҷумлаи он навҷӯиҳои наш-рия метавон номид. Гуфтаниҳо дар ин маврид зиёданд, аммо бо истифода аз фурсат таъкид менамоем, ки самаровар мебуд агар ин анъанаи «Ҷумҳурият»-ро дигар нашрияҳо низ ба роҳ гузоранд. Албатта, гап сари ғолибият дар озмун нест. Аммо ин як омилест, ки аз донишҷӯи мактаби олӣ то муҳаққиқу адибро такон мебахшад, то чизе ҷолибтару муҳимтар гӯяду офарад. Ин як омилест, ки ба ваҷҳи он чандин матолиби хуби дигар дар қолаби мавзӯоти худшиносиву ватандӯстӣ бо завқи дил навишта мешаванд, ки чун моли таърих боқӣ мемонанд. Зеро рӯзнома бойгонии таърих аст ва рӯзе ба он чун ба сарчашмаву маъхазҳо муроҷиат менамоянду дараҷаи меҳру муҳаббати ватандории замонҳои гуногунро қиёсҳо менамоянд. Чуноне ки замоне устод Айнӣ дар саҳифаҳои он менавишту имрӯз он навиштаҳоро чун як ганҷинаи пурарзиш меомӯзему таҳқиқ менамоем.
Бахтиёри ҚУТБИДДИН,
устоди Донишгоҳи миллии Тоҷикистон
Баёни ақида (0) Санаи нашр: 22.09.2017 №: 200 Мутолиа карданд: 2404
