мулоқотҳо
МУЛОҚОТ БО ДОИРАИ СОҲИБКОРИИ ИМА
21 сентябр дар доираи иштирок дар чорабиниҳои сатҳи баланди Созмони Милали Муттаҳид дар шаҳри Ню - Йорк Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо истифода аз имкони мусоид бо доираи соҳибкории Иёлоти Муттаҳидаи Амрико мулоқот намуданд.
Чорабинӣ бо сухани муқаддимавии раиси Шӯрои соҳибкорони Ҷумҳурии Тоҷикистон ва ИМА Филлип Де Леон оғоз гардид.
Сипас, дар ҳузури ҷамъомадагон ноиби президент - мудири иҷроияи ширкати “Ҷенерал электрик” - и Амрико дар Иттиҳоди Давлатҳои Мустақил Роналд Поллетт баромад намуда, ба Сарвари давлат Эмомалӣ Раҳмон барои дарёфти фурсат ва иштирок дар ин чорабинӣ изҳори миннатдорӣ кард.
Роналд Поллетт, аз ҷумла иброз дошт, ки Тоҷикистон шарики боэътимод ба ҳисоб меравад ва ин давлат ба қатори даҳгонаи кишварҳои дорои иқтидори бузурги гидроэнергетикӣ шомил мебошад. Аз ин хотир, мо ҳамчун ширкати дорои имкониятҳои бузурги технологӣ дар соҳаи гидроэнергетика ҳавасманди истифодаи бештари ин технология дар соҳаи гидроэнергетикаи Тоҷикистон ҳастем.
Дар кори ҳамоиши соҳибкорон Президенти Ҷумҳурии Тоҷикистон Эмомалӣ Раҳмон сухан карданд.
Манфиатдории ҷониби Тоҷикистонро аз рушди равобити ҳасанаю ҳамаҷониба бо ИМА таъкид карда, Сарвари давлат Эмомалӣ Раҳмон вохӯрии имрӯзаро васоити хуби тавсеабахши ҳамкориҳои иқтисодию тиҷоратии байнидавлатӣ арзёбӣ намуданд.
Дар анҷоми чорабинӣ раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Файзиддин Қаҳҳорзода бо маърӯзаи мукаммал имтиёзҳо ва имкониятҳои иқтисодию сармоягузории Тоҷикистонро ба ҳозирин муаррифӣ намуд.
Баёни ақида (0) Санаи нашр: 22.09.2017 №: 200 Мутолиа карданд: 2355
