ҳуқуқ
ЧАРО ДАВЛАТМУРОД ПАСИ ПАНҶАРА РАФТ? АЗ ИШТИБОҲИ СОКИНОН ТО ФИРЕБИ КОРМАНДИ ТАҚАЛЛУБӢ
Суди ноҳияи Шоҳмансури шаҳри Душанбе шаҳрванд Давлатмурод Азизов - зодаи ноҳияи Вахши вилояти Хатлонро дар содир намудани ҷинояти қаллобӣ айбдор намуда, 7 сол равонаи зиндон кард.
Маҳкумшуда 18 январи соли ҷорӣ худашро корманди Прокуратураи генералии Ҷумҳурии Точикистон муаррифӣ намуда, ба бовари шаҳрванд Тӯйчӣ Тошев даромада, ӯро ба иштибоҳ андохтааст. Ин тақаллубкор бо ваъдаи бардурӯғи гӯё дар Соли ҷавонон эълон шудани «авфи махфӣ», барои озод намудани фарзандаш Тошев Худобахш, ки барои содир намудани ҷиноят бо моддаи 3071 - и Кодекси ҷиноятии Ҷумҳурии Тоҷикистон аз озодӣ маҳрум шудааст, аз ӯ шаш ҳазор сомонӣ гирифта, ғайб мезанад.
Номбурда, такроран, бо мақсади тасарруфи молу мулки ғайр, 20 январи соли равон, худашро корманди Кумитаи давлатии амнияти миллии Ҷумҳурии Тоҷикистон муаррифӣ карда, бо ҳамин роҳ аз Мамлакат Исматова низ панҷ ҳазор сомонӣ гирифтааст. Ба ҳамаи ин қонеъ нашуда, судшаванда бо шаҳодатномаи сохта, боз се нафарро ба доми фиребаш даровардааст. Ӯ аз шаҳрвандон Ҷамила Якубова 700 доллари амрикоӣ, Нарзигул Мирзоева 6 ҳазор сомонӣ ва аз Малика Обирова ду адад телефони мобилӣ, ки 1000 сомонӣ арзиш доранд ва 4 ҳазор сомонӣ, боз бо баҳонаи аз зиндон озод кардани фарзандонашон, гирифтааст.
Бо ҳукми суд нисбат ба Давлатмурод Азизов бар асоси моддаи 247 қисми 3, бандҳои «а, в» Кодекси ҷиноятии Ҷумҳурии Тоҷикистон ҷазои маҳрум сохтан аз озодӣ ба муҳлати ҳафт сол, бо маҳрум кардан аз ҳуқуқи машғул шудан ба фаъолияти молию пулӣ алоқаманд ба муҳлати се сол, бо адо намудани ҷазо дар колонияи ислоҳии дорои низомаш сахт таъйин гардид.
Шарифхон САЙДАЛИЗОДА,
судяи суди ноҳияи Шоҳмансур
Баёни ақида (0) Санаи нашр: 11.10.2017 №: 212 Мутолиа карданд: 1772