порлумон
ЗАМИН. БАРАСМИЯТДАРОРИИ ҲУҚУҚИИ ИСТИФОДАИ ОН СОДАТАР МЕШАВАД
Минбаъд барои ба низом даровардани ҳуҷҷати тасдиқкунандаи ҳуқуқи истифодаи замин, яъне ба ҷойи додани ду ҳуҷҷати тасдиқкунанда (Сертификати ҳуқуқи истифодаи замин ва Шаҳодатнома дар бораи бақайдгирии давлатӣ) як ҳуҷҷат - Шаҳодатнома дар бораи бақайдгирии давлатӣ дода мешавад.
Ин нукта аз ҷониби Азизмамад Каримзода, муовини якуми раиси Кумитаи давлатии идораи замин ва геодезӣ, зимни баррасии лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи бақайдгирии давлатии молу мулки ғайриманқул ва ҳуқуқҳо ба он» ироа гардид.
Лоиҳа аз ҷониби Ҳукумати Ҷумҳурии Тоҷикистон бо истифода аз тартиби ҳуқуқи ташаббуси қонунгузорӣ пешниҳод гардидааст. Қонуни мазкур аз 20 марти соли 2008 мавриди амал қарор дошта, имрӯз барои мутобиқгардонии он ба талаботи Конститутсия, кодексҳои гражданӣ ва замин, қонунҳои Ҷумҳурии Тоҷикистон «Дар бораи санадҳои меъёрии ҳуқуқӣ», «Дар бораи бақайдгирии асноди ҳолати шаҳрвандӣ» ва «Дар бораи забони давлатӣ», инчунин, бартараф намудани мухолифати дохилии меъёрҳои мушаххаси қонун, норасоиву камбудиҳои ҷойдошта, истифодаи мафҳуму ибораҳои якхелаи ҳуқуқӣ, мусоидат ба таъмини риоя ва иҷрои қонунгузорӣ зарурият пеш омадааст.
Назар ба гуфтаи Азизмамад Каримзода, лоиҳа масъалаҳои бақайдгирии давлатии молу мулки ғайриманқули шахси фавтида, барӯйхатгирии техникии молу мулки ғайриманқул ва хусусиятҳои бақайдгирии пайдоиши ҳуқуқи истифодаи қитъаи заминро муайян менамояд. Ҳамчунин, масъалаҳои тартиби содагардонии анҷомдиҳии амалиёти бақайдгирии давлатии молу мулки ғайриманқул, ҳуқуқҳо ва маҳдудиятҳои (гарониҳои) ҳуқуқҳо ба молу мулки ғайриманқулро низ ба танзим медарорад.
Тоҳир Ҷобирзода, вакили порлумон, иброз дошт, ки қабули қонуни мазкур имкон медиҳад, ки ҳуҷҷатгузориҳо тибқи қонунгузории амалкунандаи гражданӣ ба роҳ монда шаванд ва минбаъд баҳсҳоро аз байн баранд. Дар сурати мавриди амал қарор гирифтани қонун воридшавии хироҷҳо ба буҷет беҳбудӣ меёбад, хароҷоти иловагии беасос аз байн бардошта мешавад, шароити иҷтимоии соҳибмулкон беҳтар мегардад.
Мунаввари САФАР, «Ҷумҳурият»
Баёни ақида (0) Санаи нашр: 24.10.2017 №: 220 Мутолиа карданд: 3244
