ҳуқуқ
БАХТНОМАИ МИЛЛАТ
Халқи шарафманди Тоҷикистон 6 ноябри соли 1994, бо вуҷуди вазъи душвори сиёсиву иқтисодӣ ва нобасомониву мушкилоти солҳои аввали истиқлолият, бо камоли масъулияти шаҳрвандӣ, дарки қарзи ватандорӣ ва такя ба арзишу муқаддасоти таърихиву фарҳангии худ аз тариқи раъйпурсии умумихалқӣ нахустин Конститутсияи давлати соҳибистиқлоли худро қабул карда, бо чунин иқдоми таърихӣ орзую ормонҳои чандинасраи ниёгони хешро амалӣ намуд.
Боиси ифтихори ҳар як тоҷику тоҷикистонист, ки қонуни асосии мо дар байни кишварҳои аъзои Иттиҳоди Давлатҳои Мустақил дувумин Конститутсияи бо роҳи раъйпурсии умумихалқӣ қабулшуда мебошад. Нақши таърихии ин санади олии ҳуқуқӣ, пеш аз ҳама, дар он аст, ки аз солҳои аввали соҳибистиқлолӣ халқи Тоҷикистон ҳамчун баёнгари соҳибихтиёрӣ ва сарчашмаи ягонаи ҳокимияти давлатӣ сарнавишти худро маҳз тибқи муқаррароти ҳамин ҳуҷҷати сарнавиштсоз муайян намуда, самтҳои тараққиёти ҳамаи соҳаҳои зиндагиашро мушаххас гардонд.
Ба таъкиди Пешвои муаззами миллат муҳтарам Эмомалӣ Раҳмон, дар таърихи давлатдории тоҷикон бори аввал дар сатҳи Конститутсия ҳокимияти судӣ ба ҳайси шохаи мустақили ҳокимияти давлатӣ эътироф гардид. Ҳамзамон бо ин, маҳз Конститутсияи кишвар риоя ва ҳифзи ҳуқуқу озодиҳои инсон ва шаҳрвандро тавассути фаъолияти мақомоти судӣ кафолат дод. Бо назардошти он, ки дар давлати демократӣ нақши ҳокимияти судӣ дар ҳифзи ҳамаҷонибаи ҳуқуқу озодиҳои инсон ва шаҳрванд, ҳимояи манфиатҳои қонунии давлат ва ташкилоту муассисаҳо бағоят назаррас аст, ба ин рукни мустақил таваҷҷуҳи зиёд зоҳир мешавад. Дар ин замина барномаи ислоҳоти судӣ-ҳуқуқӣ қабул гардида, татбиқи босамари он дар баробари дигар пешрафтҳои низоми судӣ дар беҳтар кардани вазъи иҷтимоии судяҳо низ таъсири мусбат гузошт. Гузашта аз ин, дар доираи татбиқи барнома дар назди судҳо коллегияҳои ҷиноятӣ, гражданӣ, оилавӣ ва ҳуқуқвайронкунии маъмурӣ таъсис дода шуданд. Ба тарбияву ҷобаҷогузории кадрҳои нав дар мақомоти судӣ диққату эътибори махсус дода мешавад. Тавассути мактаби такмили ихтисосу бозомӯзии назди Суди Олии Ҷумҳурии Тоҷикистон садҳо нафар ҷавонон савияи дониши касбӣ ва маҳорати хешро баланд бардошта, барои кор ба мақомоти судӣ роҳхат гирифтанд ва ҳоло бо масъулияти дучанду боварии комил кору фаъолият доранд.
Бо назардошти аҳамияти бузурги ин ҳуҷҷати сарнавиштсоз ҳар як фарди солимфикри кишвар бояд дар омӯзиш, тарғибу ташвиқи мазмун ва моҳияти Конститутсия - ин бахтномаи миллат ва дигар санадҳои меъёрии ҳуқуқии амалкунанда саҳми назарраси худро гузорад.
Олуфтабону АСКАРЗОДА,
корманди суди шаҳри Душанбе
Баёни ақида (0) Санаи нашр: 09.11.2017 №: 228-229 Мутолиа карданд: 1638
