ҳуқуқ
МАШҚҲОИ МУШТАРАК ДАР ГАРНИЗОНИ ХАТЛОН
Дар машқгоҳи низомии «Ҳарбмайдон» - и Гарнизони Хатлон машқҳои муштараки амалиётӣ - стратегии Қувваҳои муштараки вокуниши фаврии Созмони аҳдномаи амнияти дастаҷамъӣ шурӯъ гардид, ки то 20 ноябри соли равон идома хоҳад ёфт.
Аз маркази матбуоти Вазорати мудофиаи кишвар иттилоъ доданд, ки илова бар ин, дар асоси қарори дуҷонибаи роҳбарони сатҳи олии Тоҷикистону Русия дар машқгоҳҳои ҳарбии «Сумбула», «Лоҳур», «Ҳомиён» ва минтақаҳои наздисарҳадии «Ҳалқаёр ва «Ҷайралӣ», бо ҷалби ҷузъу томҳои Қувваҳои мусаллаҳи Ҷумҳурии Тоҷикистон ва Ҳавзаи марказии ҳарбии Федератсияи Русия машқҳои баталёнӣ - тактикӣ пешбинӣ гардидааст. Мувофиқи нақша дар доираи баргузории машқҳои муштараки ҳарбӣ, гурӯҳҳои амалиётии вазоратҳои мудофиаи кишварҳои узви СААД ва интиқоли теъдоди неруҳои муайяншудаи Федератсияи Русия, ҷумҳуриҳои Белорус, Қазоқистон, Арманистон ва Қирғизистон муҷаҳҳаз бо силоҳу техникаҳои зиреҳпӯш, захираи лавозимоти ҷангӣ ва дигар дастгоҳу маводи зарурӣ, тавассути ҳавопаймоҳои ҳарбиву нақлиётӣ ва роҳпаймоии маршӣ ба Ҷумҳурии Тоҷикистон сурат мегирад.
Машқҳои муштарак дар се марҳала ба нақша гирифта шуда, ба он, дар маҷмӯъ, беш аз панҷ ҳазор ҳайати шахсӣ ҷалб мегардад. Ҳамзамон, дар ин размоиши муштараки васеи низомӣ 64 адад авиатсияи мухталифи ҷангӣ, зиёда аз 1500 техникаи гуногуни зиреҳпӯши ҳарбиву артиллерӣ ва автомобилӣ, силоҳу муҳимоти дигари ҳарбӣ истифода мешавад. Гузашта аз ин, дар даври ниҳоии машқҳои муштарак зарбаҳои шадиди маҷмӯи мушакҳои амалиётӣ - стратегии Искандар - М пешбинӣ гардидааст.
Ҳадаф аз баргузории машқҳои муштарак дар Ҷумҳурии Тоҷикистон, пеш аз ҳама, мукаммалгардонии сатҳи омодабошии ҷангии ҷузъу томҳои Қувваҳои муштараки вокуниши фаврии Созмони аҳдномаи амнияти дастаҷамъӣ, тарҳрезии назару муносибати ягонаи кории мақомоти идории ҳарбии кишварҳои аъзо дар ташкили амалиёти муштараки зиддитеррористӣ дар шароити кӯҳистон, бо усули ягона идора кардани Ситоди муштараки муттаҳидаи қӯшунҳо, таъмини бехатарӣ дар минтақа ва табодули таҷриба дар мубориза бар зидди гурӯҳҳои террористиро дар бар мегирад.
Лашкар ШАРИФ, “Ҷумҳурият”
Баёни ақида (0) Санаи нашр: 10.11.2017 №: 230 Мутолиа карданд: 1880