маориф
ХУҶАНД. МУКОФОТҲОИ ПУЛӢ БА ДОНИШҶӮЁНУ ХОНАНДАГОНИ ФАЪОЛ
Раиси шаҳри Хуҷанд Маъруф Муҳаммадзода, зимни як мулоқот бо ҷавонони фаъол, донишҷӯёну хонандагони пешқадами донишгоҳҳо ва муассисаҳои таҳсилоти миёнаи умумиро бо мукофотҳои пулӣ қадр кард. Дар доираи ин тадбир хонандагони муассисаҳои таҳсилоти миёнаи умумӣ аз 750 то 2000 сомонӣ ва донишҷӯёну устодони ҷавон аз 1000 то 3000 сомонӣ маблағҳои пулӣ ба даст оварданд. Ҳамчунин, ба 125 нафар донишҷӯи аълохони ятиму камбизоат 150 сомонӣ супурда шуд.
Дар ин бора Маъмури Юсуфзод, роҳбари маркази матбуоти дастгоҳи раиси шаҳри Хуҷанд, ба «Ҷумҳурият» иттилоъ дод. Ба қавли манбаъ, раиси шаҳр дар суҳбат бо ҷавонони фаъол изҳор доштааст, ки дар раванди ҷаҳонишавӣ масъалаҳои марбут ба рӯзгори ҷавонон, аз ҷумла донишҷӯён, ҳамчун неруи ояндасози миллат дар меҳвари сиёсати давлату Ҳукумати кишвар қарор дорад. Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо назардошти саҳми ҷавонон дар рушди ҷомеа ва иштироки фаъолонаашон дар ҳаёти сиёсиву иқтисодии мамлакат дар Паёми худ ба Маҷлиси Олии мамлакат соли 2017 - ро Соли ҷавонон эълон карда, қайд намуданд: «Ҷавонони мо дар ҳар ҷое, ки бошанд, бояд ҳисси баланди миллӣ дошта бошанд, бо Ватан, миллат, давлати соҳибистиқлоли худ ва забону фарҳанги миллии хеш ифтихор намоянд ва барои ҳимояи онҳо ҳамеша омода ва ҳушёру зирак бошанд».
Маъруф Муҳаммадзода, дар хитоб ба ҷавонон гуфт, ки бояд ба боварии Пешвои муаззами миллат сазовор ва дар ҳама кор қобили эътимод бошанд. Ӯ аз фаъолияти босамари 75 нафар олим ва 30 нафар ихтироъкори ҷавони шаҳр, ки дар бахшҳои гуногун корҳои босамарро анҷом дода истодаанд, тавсиф намуда, аз ҳозирин даъват ба амал овард, ки бо истифода аз шароитҳои мусоиди таълиму тадрис донишу малакаи худро тавсеа бахшида, дар рушду нумӯи Ватани азизамон саҳми бештару муассир гузоранд.
Сарвиноз ШОДМОНОВА,
«Ҷумҳурият»
Баёни ақида (0) Санаи нашр: 18.12.2017 №: 255 Мутолиа карданд: 1176
