номаҳо
БОНК ҚАРЗДОР БОШАД, ЧӢ?
31 марти соли 2016 бо маслиҳати ҳамкорон қариб 30 ҳазор сомонӣ маблағи бо меҳнати ҳалол ҷамъкардаи шавҳару ду писарамро дар «Агроинвестбонк» гузоштам. Аслан нияти ман фоида гирифтан ҳам набуд. Азбаски тамоми рӯз дар кор будаму дар хона касе набуд, пиндоштам, ки дар ҷои амн нигаҳдорӣ шавад, беҳтар аст.
Инак, хостем писарамонро оиладор кунем. Аммо бо кадом пул? «Агроинвестбонк» дигар пуламонро намедод, ҳарчанд мо аллакай арӯсро хостгорӣ карда будем. Борҳо ба дари бонк рафтанамон фоида накард. Ҳамеша мегуфтанд, ки фалон вақт аҳвол хуб мешавад, ҳатман пулатонро медиҳем.
Ба ин ваъдаҳо бовар кардему қарз гирифтем. Ин магар хандаовар нест, ки пул дошта бошиву қарз бигирӣ? Аммо чи илоҷ, «кори хайрро ақиб партофтан хуб нест» - гуфтани модари пирамро ба инобат гирифта, бо қарз тӯйро гузарондем.
Як моҳ, ду, се моҳ, ним сол гузашт, аммо аз беҳ шудани аҳволи бонк дараке нест. Акнун қарзхоҳон дари маро «охурча» кардаанд. Ҳолати ногуворам ба дараҷае расидааст, ки агар аз дар касе дарояд, дилам меларзад. Бо ҳазору як баҳона, зориву тавалло қарзхоҳонро гусел мекунам. Аз ҳамсояҳо, хусусан арӯсамон шарм медорам. Музди кор ба рӯзгор сарф мешавад. Дирӯз масъулон гуфтанд, ки «Агроинвестбонк» 115 миллион сомонӣ пасандози мардумро баргардондааст. Дар ду моҳ, гӯё, ин бонк 61 миллион сомонӣ амонати мардумро додааст. Ин пулро киҳо гирифта бошанд? Мегӯянд, ки дар аввали соли 2018 ин масъала роҳи ҳаллашро меёбад. Ин ҳал шудани мушкилро шояд бори даҳум ваъда медиҳанд.
Агар кас аз бонк қарздор бошад, манзилу амволашро мусодира кардаву ба музояда монда қарзро мерӯёнанд. Аммо бонк қарздор бошад - чӣ?
Маҳбуба БОБОҶОНОВА,
шаҳри Конибодом
Баёни ақида (0) Санаи нашр: 18.12.2017 №: 255 Мутолиа карданд: 1404
