порлумон
НБО - и НОРАК ТАҶДИД МЕШАВАД
Неругоҳи барқи обии Норак бар асоси як созишнома миёни Ҷумҳурии Тоҷикистон ва Ассотсиатсияи байналмилалии рушд навсозӣ хоҳад шуд. Вакилони Маҷлиси намояндагон рӯзи 20 декабр дар ин бора Созишнома оид ба маблағгузорӣ ва грант оид ба лоиҳаи «Барқарорсозии Неругоҳи барқи обии Норак, марҳилаи 1» - ро тасвиб карданд.
Усмоналӣ Усмонзода, вазири энергетика ва захираҳои оби Ҷумҳурии Тоҷикистон, зимни муаррифии созишнома дар порлумони кишвар изҳор дошт, ки ҳанӯз соли 2015 - 2016 бо ҷалби маблағгузории Ассотсиатсияи байналмилалии рушд тадқиқоти асосноксозии техникию иқтисодии таҷдиди НБО - и Норак ва бехатарии сарбанд гузаронда шудааст. Ин пажӯҳиш аз ҷониби ширкати «Tranctebel Engineering» - и Ҷумҳурии Фаронса анҷом шуда, хазинаи тарҳи навсозии неругоҳ тақрибан 700 миллион доллар муайян гардид.
Назар ба гуфтаи вазир, Неругоҳи барқи обии Норак солҳои 70 – уми асри гузашта сохта ба истифода дода шуда, дар давоми 46 сол беш аз 434 миллиард кВт соат неруи барқ истеҳсол шудааст. Айни замон, бинобар куҳнаву фарсуда шудани таҷҳизот тавоногии агрегатҳо аз 25 то 35 мегават кам гардидааст. Имрӯз зарурати таҷдиду азнавбарқарорсозии неругоҳ ба миён омадааст. Барои марҳилаи якуми лоиҳа аз ҷониби Ассотсиатсияи байналмилалии рушд 225 миллион доллар қарз ва грант, ҳамчунин, аз ҳисоби Бонки АвруОсиёгии рушд 40 миллион доллар қарз ҷудо шудааст. Дар доираи марҳилаи якуми лоиҳа таҷдиди се гидроагрегат, шаш автотрансформатор ва корҳои вобаста ба бехатарии сарбанд амалӣ карда мешаванд. Муҳлати татбиқи марҳилаи якуми лоиҳа 5 сол ва муҳлати таҷдиди пурраи неругоҳ 10 солро дар бар мегирад.
Мунаввари САФАР, “Ҷумҳурият”
Баёни ақида (0) Санаи нашр: 22.12.2017 №: 258 Мутолиа карданд: 5018
