номаҳо
СИПОС БА ШАҲРДОРӢ
Душанберо ҳеҷ соле ба ин зебоиву дилрабоӣ надида будам. Бахусус, сарсабзии арчазорҳояш торафт фарохтар доман паҳн мекунад.
Ҳанӯз аз ёдам нарафта, ки ба ин амали нек нахустин шуда Пешвои миллат муҳтарам Эмомалӣ Раҳмон иқдом варзиданд. Худ дар маъракаҳои нишондани арча бевосита ширкат намуданд. Ҳолиё шаҳрдорӣ ин иқдоми некро идома дода истодааст. Дар мавриди мазкур саъю кӯшиши зиёди саривақтӣ анҷом мепазирад. Ҳатто агар баъди ду рӯз аз як гӯшаи шаҳр ба гӯшаи дигари он биравӣ, ҳатман тағйиротеро дар боби ободонӣ мебинӣ. Мебиниву мутмаин мегардӣ, ки пойтахти мамлакат симои худро беҳтар аз бештар дигар мекунад.
Мурод аз ирсоли ин нома баёни як ҳақиқати дигар аст, ки он ҳам иртибот мегирад ба ташаббусҳои созандагии шаҳрдорӣ. Агар қиёс шавад, пештар фақат дар маркази шаҳр як арчаи солинавӣ меоростанду халос. Имсол бошад, он дар ҳар як ноҳияи шаҳр ба зебоиву дилрабоӣ қомат афрохтааст. Махсусан, шабонгоҳ бо афрӯхтани чароғакҳои рангоранг ҳусни шаҳр меафзояд.
Мардум гирди он шабонгоҳон ҷамъ меоянд. Овезаҳои солинавӣ ҳам диққатҷалбкунандаанд. Ба ман махсусан ороиши солинавии дар миёни чорраҳаи назди «Гулистон» - у бинои «Агроинвестбонк» бисёр писанд афтод.
Ин ҳама тадбирандешиҳои дуруст касро умедвор месозад, ки соли 2018 - соли беҳтару фаромӯшношуданӣ хоҳад гашт.
Ба шаҳрдорӣ бо изҳори сипоси бепоён дар фаъолияти чашмрасу ташаббусҳои наҷибаш барор мехоҳаму муваффақиятҳои бештарро таманно мекунам.
Қурбоналӣ МАҶИДЗОДА,
шаҳри Душанбе
Баёни ақида (0) Санаи нашр: 27.12.2017 №: 261 Мутолиа карданд: 1302
