порлумон
ОФАТҲОИ ТАБИАТ. 50 МИЛЛИОН ДОЛЛАР БАРОИ ПЕШГИРӢ АЗ ХАТАРҲОИ ЭҲТИМОЛӢ
Дар 5 соли охир роҳҳои автомобилгарди кишвар аз офатҳои табиат дар ҳаҷми 62 миллиону 905 ҳазор сомонӣ зарар дидаанд. Барои барқарор намудани роҳҳо ва иншооти зарардида дар ин муддат аз ҳамаи манбаъҳо 12694 ҳазор сомонӣ сарф шудааст.
Ин матлабро Худоёр Худоёрзода, вазири нақлиёти Ҷумҳурии Тоҷикистон, зимни баррасии лоиҳаи «Мустаҳкам намудани инфрасохтори муҳим ҷиҳати таъмини устуворӣ зидди хатарҳои табиӣ» дар ҳузури вакилони Маҷлиси намояндагон баён дошт. Тавре зикр шуд, арзиши умумии ин тарҳ 50 миллион долларро ташкил дода, аз он 25 миллион доллар қарзи имтиёзнок ва 25 миллиони дигарро гранти Ассотсиатсияи байналмилалии рушд ташкил медиҳад.
Рӯи даст гирифтани чунин як тарҳи муҳим дар ҳолест, ки ба гуфтаи Раҳмон Холмурод, директори Агентии беҳдошти замин ва обёрии назди Ҳукумати Ҷумҳурии Тоҷикистон, дар мамлакат 947 дарё ва 276 сой бо дарозии умумии қариб 30 ҳазор километр мавҷуд аст, ки дар мавсими обхезӣ хисороти моливу ҷониро ба бор меоранд. Минтақаҳое, ки ба селҳо нисбатан зиёд дучор мешаванд, ҳавзаҳои дарёҳои Панҷ, Вахш, Сурхоб, Оқсу, Қизилсу, Варзоб, Кофарниҳон, Хонақоҳ, Зарафшон, Исфара ва сойҳои калони шаҳру ноҳияҳои Кӯлоб, Балҷувон, Темурмалик, Шамсиддин Шоҳин, Деваштич, Ашт, Спитамен, Панҷакент, Шаҳристон ба ҳисоб мераванд. Дар ҷумҳурӣ 1386 километр садҳои муҳофизатӣ ва 710 селпарто бо дарозии 503 километр мавҷуд аст, ки ба ҳолати имрӯза 416 километр садҳои муҳофизатӣ ва 137 километр селпартоҳо бар асари селу обхезӣ вайрон гардидаанд.
Вакилони порлумон баъд аз баррасии тарҳ ҷиҳати татбиқи он Созишномаи маблағгузорӣ ва грантӣ байни Ҷумҳурии Тоҷикистон ва Ассотсиатсияи байналмилалии рушдро ба тасвиб расонданд. Созишнома аз чор бахш иборат буда, ҳадафи асосии он пешгирии зарари офатҳои табиат дар Ҷумҳурии Тоҷикистон мебошад.
Мунаввари САФАР,
«Ҷумҳурият»
Баёни ақида (0) Санаи нашр: 02.01.2018 №: 1 Мутолиа карданд: 5187
