номаҳо
МАН ҲАМ ФИРЕБ ХӮРДАМ
«Чу ман фиреб нахӯред» - и С.Давлатзодаро дар гӯшаи «Шаҳрванд» («Ҷумҳурият», 3 январи соли 2018) хондаму зарур шумурдам, ки оид ба ин масъала ҳатман бинависам. Эҳсос мекунам, ки агар масъала ҳалли дурусти худро наёбад, он минбаъд ба мушкилот бадал мегардад.
Ман ҳам чун муаллифи ин нома фиреб хӯрдам, дар хатсайри рақами 16. Ронанда марди пиронсол буду риши калони сафед дошт. Ӯ пули сесомониаи маро гирифту ду сомонӣ бақия дод. Яке аз он қалбакӣ буд. Албатта, нахуст ба серияҳои он назар кардам. Дар ҳар ду ҷониб – рост ва чап дар ин маврид тафовут вуҷуд надошт, аммо рақамҳо фарқ менамуданд. Дар ҷониби рост 2035971 ва дар ҷониби чап 7826482 навишта шуда буд. Хостам онро ба ронанда баргардонам, вале аз аҳли нишаст шарм доштам. Ба ҷуз ин, фикр намудам, ки ронандаи мӯйсафед ҳам мисли ман фиреб хӯрдаасту аз мусофире онро нафаҳмида гирифтааст. Ҳеҷ мумкин набуд, ки ин амалро ӯ қасдан раво дида бошад. Ба ин хулоса омадам, ки пулро барнагардонам ва ронандаро дар ҳолати ногувор нагузорам. Охир ӯ ҳам наметавонад, ки ба ҳар пул бодиққат бинигарад, ки рақамҳову серияҳо мувофиқат мекунанд ё не.
Аслан мо сари пули миллӣ, эҳтирому нигаҳдошти он бояд биандешем.
Бисёр мехостам, ки масъулон дар ин хусус тадбирандешӣ бикунанд. Чӣ бояд кард? Ин пурсиш посухи фавриро хоҳон мебошад ва низ масъалаи мазкур ҳалли дурусту саривақтиро талабгор аст.
Ҷ. АМИНЗОДА, шаҳри Душанбе
Баёни ақида (0) Санаи нашр: 11.01.2018 №: 9 Мутолиа карданд: 1291
