ҳуқуқ
КОРРУПСИЯ. АЗ БОЗДОШТИ ЗАМИНФУРӮШОН ТО ПОРАХӮРӢ ДАР БЕМОРХОНА
Кормандони раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Хатлон зимни андешидани тадбирҳои судманд ришваситонии чанд мансабдорро ошкор карданд.
Ҳабибулло Тағоев, сармутахассис оид ба корҳои дин, танзими анъана ва ҷашну маросимҳои миллӣ дар Ҷамоати деҳоти “50-солагии Тоҷикистон” - и ноҳияи Абдураҳмони Ҷомӣ, ҳанӯз моҳи ноябри соли 2014 аз сокини ноҳия С. Сайфиддинов барои ҷудо ва ҳуҷҷатгузорӣ кардани 0,6 гектар қитъаи замини наздиҳавлигӣ аз ҳудуди заминҳои деҳаи Ёсумани ҳамин ҷамоат 6 ҳазору 200 доллари амрикоӣ талаб карда мегирад. Номбурда аз ин маблағ 200 долларашро гирифта, боқимондаашро ба муовини раиси ҷамоат Бобоҷон Ғоибов медиҳад.
Абдураҳим Қувватов, замони дар вазифаи муовини сардори раёсати Агентии суғуртаи иҷтимоӣ ва нафақа дар ноҳияи Вахш буданаш 28 ноябри соли 2013 бо роҳи фиреб ба боварии шаҳрванд Р. Зокиров даромада, аз ӯ барои ҷудо кардани 0,12 гектар қитъаи замини наздиҳавлигӣ ва омода кардани сертификати ҳуқуқи истифодаи қитъаи замин 9 ҳазору 500 доллари амрикоӣ гирифтааст.
Нурмуҳаммад Умронов, сардухтури беморхонаи марказии ноҳияи Панҷ, аз сокини ноҳия С. Зоидова барои аз вазифаи ҳамшираи тиббии шуъбаи бемориҳои дили беморхонаи мазкур ба вазифаи ҳамшираи тиббии шуъбаи қабул ва ёрии таъҷилии ҳамин беморхона гузарондан аз ӯ ба воситаи котибаи худ Саодат ба сифати пора 200 доллари амрикоӣ талаб кардааст. Санаи 24 июли соли 2017 аз ин маблағ 100 долларашро гирифта, овардани боқимондаи пулро тақозо кардааст.
Ашраф Зардаков, хазинадори шуъбаи муҳосибии беморхонаи марказии ноҳияи Панҷ, аз ҳисоби маблағҳои хизматрасониҳои пулакии шуъбаҳои дил, ҷарроҳӣ ва таваллуд аз 1 январи соли 2015 то 1 январи соли 2017 аз ҳисоби 107 бемор 31 ҳазору 65 сомониро ба хазинаи беморхона ворид накарда, ба ҷайби худ задааст.
Зокир ҲАСАН, “Ҷумҳурият”
Баёни ақида (0) Санаи нашр: 18.01.2018 №: 14 Мутолиа карданд: 1312
