мулоқотҳо
Пер Стиг Меллер:
«Тоҷикистон дар
Осиёи Марказӣ мавқеи
калидӣ дорад»
8 октябр Президенти Ҷумҳурии Тоҷикистон Эмомалӣ Раҳмон вазири корҳои хориҷии Дания Пер Стиг Меллерро ба ҳузур пазируфт.
Дар сӯҳбат масоили ҳамкории Тоҷикистон бо Дания ва дар маҷмӯъ бо Иттиҳоди Аврупо баррасӣ шуданд.
«Таҳкими равобит бо кишварҳои Иттиҳоди Аврупо яке аз самтҳои муҳим ва стратегии сиёсати хориҷии Тоҷикистон аст ва мо омодаем бо давлатҳои узви Иттиҳод, аз ҷумла бо Дания робитаҳои гуногунҷанба дошта бошем», - изҳор дошт дар оғози сӯҳбат Сардори давлат Эмомалӣ Раҳмон.
«Тоҷикистон дар минтақаи Осиёи Марказӣ аз бисёр ҷиҳат мавқеи калидӣ дорад ва мо ба вусъати ҳамкорӣ бо он манфиатдорем», - посух дод вазири корҳои хориҷии Дания Пер Стиг Меллер.
Масоили вобаста ба пешгирӣ аз гармшавии иқлим ва ҳифзи муҳити зист, ки моҳи декабри соли равон дар як конфронси ҷаҳонии сатҳи олӣ дар пойтахти Дания -шаҳри Копенҳаген баррасӣ мешаванд, мавзӯи асосии сӯҳбат буд.
Пер Стиг Меллер иттилоъ дод, ки дар Копенҳаген яке аз ҳамоишҳои Конфронси ҷаҳонии иқлим ба мавзӯи пешгирӣ аз обшавии пиряхҳо бахшида мешавад, ки барои Тоҷикистон низ бисёр муҳим аст.
Гуфтугӯйи судманд ҳамчунин оид ба масоили амнияту субот ва рушди ҳамкорӣ дар минтақаи Осиёи Марказӣ бо фарогирии Афғонистон сурат гирифт. Мусоидат ба пешрафти иҷтимоию иқтисодии кишварҳои минтақа аз роҳҳои асосии таҳкиму густариши муносибатҳои судманд маънидод гардид. Таваҷҷӯҳи зиёд ба татбиқи лоиҳаҳои гидроэнергетикӣ, нақлиёту коммуникатсионӣ ва саноатии Тоҷикистон, ки дорои аҳамияти калони минтақавӣ мебошанд, зоҳир шуд.
Вазири корҳои хориҷии Дания аз мавқеи Тоҷикистон оид ба масоили амнияту субот, ҳалли мушкилоти вобаста ба гармшавии иқлим, дастрасӣ ба оби тозаи нӯшокӣ ва дигар масоили ҳалталаби минтақавию ҷаҳонӣ изҳори қаноатмандӣ карда, ҳавасмандии кишвари худро ба густариши ҳамкории гуногунҷанба, аз ҷумла иқтисодӣ бо кишвари мо таъкид намуд.
Бояд гуфт, ки моҳи декабри соли равон дар Дания бояд Созишномаи ҷаҳонии Копенҳаген ба имзо расад ва он аз соли 2012 ба баъд ба ҷойи Протоколи Киото оид ба пешгирӣ аз гармшавии иқлими сайёра, ки мӯҳлаташ ба охир мерасад, фаъолият хоҳад кард.
Баёни ақида (0) Санаи нашр: №: Мутолиа карданд: 2088
