маориф
МАОРИФ. ДАР РОҲИ РУШД КӮШИШИ БЕШТАР НАМОЕМ!
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёмашон ба Маҷлиси Олии ҷумҳурӣ аз 22 декабри соли 2017 вазъи маорифи кишварро баррасӣ намуда, таъкид доштанд: “Мувофиқи назарсанҷие, ки созмонҳои бонуфузи ҷаҳонӣ доир ба кишварҳои рӯ ба инкишоф анҷом додаанд, соли 2017-ум Тоҷикистон аз рӯи 4 нишондиҳанда - дастрасӣ ба таҳсилот, сифати таҳсилот, сармояи инсонӣ ва қобилияти рақобати он дар миёни 101 давлати ҷаҳон ҷойи 54 - умро соҳиб шудааст. Аз рӯи ин таҳлил Тоҷикистон дар фазои Иттиҳоди Давлатҳои Мустақил яке аз ҷойҳои аввалинро ишғол менамояд”.
Ин далелҳо гувоҳи онанд, ки дар солҳои Истиқлолияти давлатӣ он нақшаву барномаҳо, ки дар соҳаи маорифи кишвар таҳти сарварии хирадмандонаи Пешвои муаззами миллат амалӣ гардиданд, бенатиҷа намонда, ин соҳаи ҳаётан муҳим ва омили наҷоти миллатро аз вартаи ҳалокат ба сӯи рушди устувор мувоҷеҳ сохтанд.
Дар ҳақиқат ҳам, соҳаи маорифи кишвари тозаистиқлоли мо тайи даҳсолаи охир дар самтҳои зиёде ба меъёрҳои байналмилалӣ наздик гардида, нишондиҳандаҳои он ба таври назаррас боло рафтанд. Ҳамзамон, мо бояд барои нигаҳдошти чунин сатҳи рушди маориф ва минбаъд таҳким бахшидани он кӯшиши бештаре ба ҳарҷ диҳем. Маҳз ба ҳамин ҷиҳати масъала дахл намуда, Пешвои маорифпарвари миллати мо дар Паёми имсолаашон таъкид доштанд, ки “ин дастоварди хуб аст, аммо мо набояд бо ин нишондиҳанда қонеъ шуда, таваҷҷуҳро ба ин соҳаи ҳаётан муҳим кам намоем”.
Дар ҷавоб ба ин ҳидояти Пешвои муаззами миллат кормандони соҳаи маориф кӯшиш ба харҷ медиҳанд, ки дар самти ба меъёрҳои байналмилалӣ баробар сохтани нишондиҳандаҳои таҳсилот боз ҳам қадамҳои устувортаре гузоранд. Ва чанд иқдоме, ки имрӯз дар ин ҷода амалӣ шуда истода, дар поён аз ду намунаи он сухан меравад, гувоҳи имконияти воқеии расидан ба ин ниятҳои нек аст.
Аввалан, чунонки маълум аст, дар кишварҳои пешрафтаи олам имрӯз ба таҳсилоти босалоҳият, ки тамоми зинаҳои таҳсилотро аз пешниҳоди донишҳо ботадриҷ ба сӯи фароҳам сохтани шароит барои соҳиб гаштан ба маҷмӯи салоҳиятҳо мебарад, мақоми аввалиндараҷа касб намудааст. Хушбахтона, дар зарфи се соли охир дар ҷумҳурии мо низ гузариши зинаи таҳсилоти миёнаи умумӣ ба таҳсилоти босалоҳият оғоз гардида, тибқи талаботи “Стратегияи миллии рушди маорифи Ҷумҳурии Тоҷикистон то соли 2020” дар муҳлатҳои муқарраргардида ба пуррагӣ амалӣ карда мешавад. Ҳамзамон, зинаҳои дигари таҳсилот низ ботадриҷ ба ин меъёри байналмилалӣ мутобиқ гардонда мешаванд, ки аминем барои боз ҳам боло бурдани нишондиҳандаҳои соҳаи маориф дар байни кишварҳои олам мусоидат мекунад.
Сониян, Вазорати маориф ва илми ҷумҳурӣ имрӯз лоиҳаи “Таҳсилоти босифат”-ро амалӣ намуда истодааст, ки дар доираи он зиёда аз 10 муассисаи таҳсилоти олии касбии кишвар ба меъёрҳои байналмилалӣ мутобиқ намудани стандартҳои таҳсилот ва барномаҳои таълимиро ба нақша гирифтаанд. Ҳамаи ин ворид шудан ба фазои таҳсилоти ягонаи ҷаҳонӣ, истифодаи технологияҳои иттилоотиву коммуникатсионии муосир дар ҷараёни таълим ва мутобиқсозии ихтисосҳоро вобаста ба талаботи бозори меҳнати дохилию хориҷӣ таъмин сохта, барои рақобатпазир гардондани таҳсилоти олии касбии ҷумҳурии мо мусоидат мекунад.
Хуршед ЗИЁӢ,
директори Пажӯҳишгоҳи рушди маориф ба номи Абдураҳмони Ҷомӣ, доктори илми фалсафа, профессор
Баёни ақида (0) Санаи нашр: 24.01.2018 №: 19 Мутолиа карданд: 1247
