номаҳо
АРЗИ МАРО НАШР НАМОЕД!
Ман 24 июни соли 2010 аз ширкати сохтмонии ҶДММ «Винбокс», ки директори генералиаш Собиров Шокир Ҷобирович буд, манзили истиқоматии 52 метри мураббаъро харидам. Азбаски ҳуҷраи ман аз чор девори холӣ иборат буд, худам хонаро таъмир ва пардоз намуда, дар он зиндагӣ кардам. Албатта, бехабар аз он будам, ки бинои мазкур аз қайди комиссияи давлатӣ нагузаштааст. Баъди як соли зиндагӣ ба ман ва дигарон маълум гашт, ки таъйиноти бинои мазкур ҳамчун «маркази коргузорӣ» ба қайд гирифта шудааст, на бинои «манзили истиқоматӣ».
Моҳи июли соли 2014 дар асоси аризаи дастаҷамъонаи истиқоматкунандагони бинои мазкур нисбати писари Собиров Шокир - Умед бо моддаи 247, қисми 4, банди «б» парвандаи ҷиноятӣ оғоз карданд ва ман он замон дар ин парванда ҳамчун ҷабрдида эътироф нашудам, чунки бо Собиров Шокир шартномаи харидуфурӯши манзили истиқоматӣ таҳти рақами 21 баста будам.
Собиров Шокир аз тарси он, ки нисбаташ парвандаи ҷиноятӣ накушоянд, қисме аз маблағҳои маро пардохт кард. Маблағҳои боқимондаам 15 марти соли 2017 аз ҷониби Суди Олии кассатсионӣ дар ҳаҷми 52.632 сомонию 99 дирам рӯёнда шуд. Аз соли 2010 то соли 2017 ва дар рафти мурофиаҳои судӣ ягон маротиба ман ва дигарон нафаҳмидем, ки Собиров Шокир манзили истиқоматии шартии маро 29 июли соли 2014 ба Мирзоев Аҳтам фурӯхтааст.
Баъди ба қувваи қонунӣ даромадани ҳалномаи мазкур ва бекор шудани шартномаи манзили истиқоматии ман Собиров ба суди ноҳияи Шоҳмансур аризаи даъвоӣ (оид ба рӯёндани зарари моддӣ ва маънавӣ) талаб кардааст, ки аз ҳисоби ман, яъне Баҳромова Ф.Т. ба маблағи 9300 доллари амрикоӣ иҷорапулӣ рӯёнда шавад.
Вақте ки дар беморхонаи «Мадади Акбар» бистарӣ будам, Собиров Шокир ва судиҷрочии ноҳияи Шоҳмансур иҷроварақаҳои ҳалномаи мазкурро яктарафа иҷро карда, маблағҳои маро надода, бе иштироки ману фарзандонам худашон чизу чораи моро бо ҳамаи молу пулу дигар боқимонда лавозимотамон ба куҷое бурданд, то ҳоло дараке надорем. Фарзандонам ба суди ин ноҳия ва судиҷрочии суди ноҳияи Шоҳмансур аризаи даъвоӣ пешниҳод карданд, ба додашон нарасиданд. Хулоса, ҳалномае, ки дар истеҳсолоташ ду иҷроварақа қарор дошт, яктарафа ҳал гашта, аз 21 декабри соли 2017 то инҷониб маро бо чор фарзанди нимятимам (шавҳарам дар қайди ҳаёт нестанд) сарсону саргардон ва хусусан, дар фасли зимистон, овора карданд. Аз ин рӯ, зарур донистам, ки дар ин хусус бинависам.
Бо эҳтироми зиёд хоҳиш менамоям, ки арзи маро дар гӯшаи «Шаҳрванд» - и рӯзномаи бонуфузи «Ҷумҳурият» нашр намоед.
Фароғат БАҲРОМОВА,
шаҳри Душанбе
Баёни ақида (0) Санаи нашр: 09.02.2018 №: 31 Мутолиа карданд: 1287
