маориф
"ОЙИНА" - И ГИМНАЗИЯ
Дар назди гимназияи № 1 барои хонандагони болаёқати шаҳри Душанбе маҳфили илмӣ - адабии «Ойина» таъсис ёфт. Ҳадаф аз он тарбияи ҷавонону наврасони эҷодкор мебошад, ки бо ин мақсад ҳафтае як маротиба бо иштироки шоирону нависандагони маъруфи кишвар ва адибони ҷавон гузаронда мешавад.
Таъсиси маҳфили «Ойина» бо хоҳишу пешниҳоди худи хонандагони боистеъдод ва волидони эшон сурат гирифт. Зеро солҳои охир сафи наврасони эҷодкор афзуда, зарурат пайдо шуд, ки ба онҳо қоидаҳои аввалияи назму наср омӯзонда шавад. Аз ин сабаб, минбаъд мутахассисони соҳаи суханшиносиро даъват намуда, кӯшиш мекунем, ки ба ин васила донишу биниш ва таҷрибаи андухтаи онҳо ба насли наврас интиқол ёбад.
Тавре ҳамагон шоҳидем, бо ғамхориву дастгириҳои ҳамешагии роҳбарияти давлат, бавижа Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар 26 соли соҳибистиқлолӣ барои атфоли тоҷик садҳо мактабу боғчаҳо, даҳҳо истироҳатгоҳу шифохонаҳо ва варзишгоҳҳои замонавӣ сохта ба истифода дода шуд. Ва ин раванд ҳанӯз ҳам бомаром идома дорад.
Имрӯз вақти он расидааст, ки зодагони истиқлол дурдонаҳои тоза ба ганҷинаи фарҳанги аҷдоди худ зам намуда, тоҷикон ва Тоҷикистонро ба ҷаҳониён муаррифӣ намоянд. Ин ҳама ниёзи давру замон аст ва фарзандони моро рағбату кӯшиши беинтиҳо дар пайи навовариҳои илмию техникӣ ва ҷавҳарнамоии истеъдоду ҳунари баланд пешорӯст. Муҳимтар аз ҳама, фарзандонамон оянда чун ойина акси моро бароямон бозмедиҳанд. Дар зиндагӣ асаре аз худ гузоштем ё на, фарзандонамон муайян хоҳанд кард. Бигзор, «Ойина» - и гимназия дар таҷаллии нуқсу камоли толибилмон ва ояндаи рӯшани онҳо хидмат намояд.
Раъно ЁРОВА,
директори гимназияи № 1 барои
хонандагони болаёқати шаҳри Душанбе
Баёни ақида (0) Санаи нашр: 13.02.2018 №: 33 Мутолиа карданд: 1172
