ҳуқуқ
ҶИНОЯТ ва ҶАЗО
ҒУЛОМИ НАФС
Мутахассиси мизи ҳарбӣ барои порагирӣ боздошт гардид
Кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон мутахассиси мизи ҳарбии Ҷамоати деҳоти Дурбати шаҳри Ҳисор Файзалӣ Аюбовро бо далели ришваситонӣ боздошт карданд.
Бино ба иттилои сомонаи агентӣ, номбурда барои тайёр карда додани билети ҳарбии корношоям аз шаҳрванд «А» 5000 сомонӣ талаб намуда, зимни гирифтани ин маблағ дар ҷойи ҳодиса дастгир шуд.
Вобаста ба ин ҳолат нисбат ба Файзалӣ Аюбов бо моддаи 247 қисми 3 банди «а»-и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишоти пешакӣ идома дорад.
ПАРВАНДАИ ҶИНОЯТӢ
алайҳи марди сархуше, ки оқибати кирдораш бо марг анҷом ёфт
Як сокини ноҳияи Кӯшониёни вилояти Хатлон дар ҳолати мастӣ даст ба куштори одам задааст. Ӯ марди 33 - солаи сокини деҳаи Қизилпартизани ноҳияро дар хонаи истиқоматиаш шадидан латукӯб карда, бо зарби корд ба ӯ ҷароҳати ҷисмонӣ расонд, ки дар роҳ ба беморхона ҷон додааст.
Рӯзи 11 феврал кормандони ШВКД дар ноҳияи Кӯшониён баъд аз дарёфти хабари телефонӣ дар бораи рух додани ҷиноят, билфосила шахси гумонбарро дастгир намуданд. Ӯ марди 46 – солаи сокини Ҷамоати деҳоти Бостонқалъаи ҳамин ноҳия буда, қаблан бо моддаҳои 240, 220, 89, 110 қисми 3 - и Кодекси ҷиноятии Ҷумҳурии Тоҷикистон суд шудааст.
Ба иттилои маркази матбуоти ВКД, аз рӯи ин ҳодиса бар асоси моддаи 104 қисми 2 - и Кодекси ҷиноятӣ парвандаи ҷиноятӣ оғоз гардидааст.
САНГҲОИ ҚИМАТБАҲО
Муомилоти ғайриқонунӣ боиси ҷавобгарӣ шуд
Маъмурони милитсия як марди 35 - солаи шаҳри Ваҳдатро ба гумони даст доштан дар муомилоти ғайриқонунии сангҳои қиматбаҳо боздошт карданд.
Ба иттилои манобеи ВКД, зимни кофтукови шахсӣ аз номбурда сангҳои қиматбаҳо дарёфт ва мусодира шудааст, ки бар пояи маълумотномаи назорати давлатии иёргирии назди Вазорати молияи Ҷумҳурии Тоҷикистон он аз 2 адад санги қиматбаҳои “зумрад”, бо вазни 5,62 грамм ва 1 адад санги “ёқут” вазнаш 114,37 грамм иборат аст.
Оид ба ин ҳодиса парвандаи ҷиноятӣ оғоз гардида, тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 15.02.2018 №: 35 Мутолиа карданд: 1164
