маориф
Пояи моддӣ–техникии таълимгоҳ беҳтар гардид
Дар нишасти матбуотӣ бо хабарнигорони васоити ахбори омма Анвар Абдурасулов, ректори Донишгоҳи техникии Тоҷикистон, аз фаъолияти семоҳаи сеюми сол маълумот дода, зикр сохт, ки бӯҳрони молиявию иқтисодии ҷаҳонӣ ба муассисаи таълимии онҳо ҳам таъсир расондааст. Вале, афзуд вай, ҳусни таваҷҷӯҳи Президенти мамлакат дар Паёми имсолаашон ба Маҷлиси Олии ҷумҳурӣ дар иртибот ба рушди маориф, таҳсилоти олии касбиву омодасозии мутахассисон ва зарурати такмили омӯзиши фанҳои дақиқи техникӣ ҳайати кормандон ва муаллимонро ба меҳнати пурсамар ҳидоят намуд.
Имсол ба донишгоҳ 2151 нафар довталаб ҳуҷҷат супурда, 1874 нафар ба сафи донишҷӯён шомил шуд. Аз ин ҳисоб 61 нафар -15 духтару 46 писар тибқи Квотаи президентӣ донишҷӯ гардид.
Таҳлилҳо нишон доданд, ки пояи моддӣ-техникии таълим -китобхонаву қироатхона, китобхонаи электронӣ, китобҳои дарсиву воситаҳои дигари таълимӣ, ҳамчунин сатҳи дониши донишҷӯён нисбатан беҳтар шудааст.
Чанд рӯз пеш дар назди донишгоҳ «Маркази машваратии КНАУФ-ДТТ» кушода шуд, ки донишҷӯён дар ин ҷо бо технологияи навин ва маводи сохтмонӣ шинос мешаванд.
Дар ин муддат хобгоҳҳои № 3, 4, толори варзишии бинои таълимии № 1, ошёнаи сеюми бинои таълимии № 2 ва синфхонаҳои таълимии факултаҳо пурра таъмир шуда, аз оғози моҳи сентябр мавриди истифода қарор гирифтанд.
Убайдуллоҳи МУРОД
Баёни ақида (0) Санаи нашр: №: Мутолиа карданд: 5472
