порлумон
ДУШАНБЕ. ДАСТРАСИИ СОКИНОН БА МАҲСУЛОТИ ХУШСИФАТ БЕШТАР МЕГАРДАД
Бо мақсади таъмини амнияти озуқаворӣ, муътадил нигоҳ доштани нархи маҳсулот ва дастрасии аҳолии пойтахти мамлакат ба маҳсулоти хушсифату нисбатан арзон вакилони Маҷлиси намояндагони Маҷлиси Олӣ лоиҳаи Қонуни Ҷумҳурии Тоҷикистон «Оид ба ворид намудани тағйир ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2018» - ро баррасӣ ва қабул намуданд.
Меҳринамо Ҷонмуҳаммадзода, муовини вазири молияи Ҷумҳурии Тоҷикистон, зимни тавзеҳи лоиҳаи мазкур дар ҷаласаи Маҷлиси намояндагон иброз дошт, ки бар асоси ин тағйирот дар соли 2018 Корхонаи воҳиди давлатӣ оид ба истеҳсол, харид, захира ва фурӯши маҳсулоти ниёзи аввалия дар шаҳри Душанбе ҳангоми фурӯши озуқа, воридоти маҳсулот, ки номгӯйи он аз ҷониби Ҳукумати Ҷумҳурии Тоҷикистон тасдиқ мегардад, аз пардохти андоз аз арзиши иловашуда озод мешавад.
Муовини вазир зикр кард, ки аҳолии шаҳри Душанбе ба ҳисоби миёна 1 миллиону 200 ҳазор нафар буда, талаботи солона ба маҳсулоти асосии ғизоӣ аз рӯи тавсияномаҳои методӣ ва муайян намудани сабати истеъмолӣ 408,1 ҳазор тонна бо арзиши 1,6 миллиард сомониро ташкил медиҳад. Аз ин миқдор аз ҳисоби мақомоти иҷроияи ҳокимияти давлатии шаҳри Душанбе дар заминаи Корхонаи воҳиди давлатӣ оид ба истеҳсол, харид, захира ва фурӯши маҳсулоти ниёзи аввалия дар шаҳри Душанбе ба аҳолии пойтахт маҳсулоти озуқаворӣ тақрибан дар ҳаҷми 81,6 миллион тонна бо арзиши 310,2 миллион сомонӣ таъмин карда мешавад, ки маблағи аз пардохти андоз аз арзиши иловашуда озодшаванда 55,8 миллион сомониро ташкил медиҳад.
Зикр шуд, ки маблағи аз ҳисоби имтиёзҳои пешбинишудаи андозӣ ба ихтиёри корхонаи мазкур гузошта шуда, он имкон фароҳам меорад, ки корхона дар мавсими ҳосилғундорӣ, маҳсулоти озуқавориро захира намояд ва дар ҳолатҳои зарурӣ ҷиҳати муътадил нигоҳ доштани нарх онро бо нархҳои дастрас дар пойтахти кишвар ба фурӯш барорад.
Мунаввари САФАР, «Ҷумҳурият»
Баёни ақида (0) Санаи нашр: 12.03.2018 №: 51 Мутолиа карданд: 5372
