номаҳо
ЧАРО КОЭФФИТСИЕНТИ БАЛАНДКӮҲӢ ҶОРӢ НАШУД?
Боиси хурсандию фараҳмандии ҳамагон аст, ки имрӯзҳо сокинони кишвар баҳри амалӣ намудани дастуру супоришҳои Роҳбари хирадкешу ояндаандеши миллат даст ба ободкорию созандагӣ зада, баҳри гул-гулшукуфии он талош меварзанд.
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳангоми яке аз сафарҳои кориашон ба ноҳияҳои Вилояти Мухтори Кӯҳистони Бадахшон, махсусан водии Бартанги ноҳияи Рӯшон, ки соли 2016 сурат гирифта буд, ба ҳалли чанд мушкилоти ҷойдоштаи сокинони деҳаҳои болооби Бартанг махсус таъкид намуданд. Яке аз ин супоришҳо боло бардоштани маоши омӯзгорони рустоҳое, ки аз сатҳи баҳр дар баландии зиёд кору зиндагӣ доранд, яъне ба маоши онҳо илова кардани коэффитсиенти баландкӯҳӣ буд.
Мо, омӯзгорони деҳаи Рошорви ноҳияи Рӯшон, ки аз сатҳи баҳр дар баландии 3200 метр зиндагӣ дорем, аз ғамхориҳои доимии Пешвои миллат ҳамеша миннатдорем ва гарм истиқбол мегирем. Аммо аз чӣ бошад, ки супориши мазкур ҳанӯз ҳам амалӣ нагардида истодааст? Бинобар ин, мо – як гурӯҳ омӯзгорони муассисаи таҳсилоти миёнаи умумии № 30 - и деҳаи Рошорви ноҳияи Рӯшон барои ҳалли ин масъала аз тариқи рӯзномаи дӯстдоштаамон «Ҷумҳурият» ба масъулини соҳа муроҷиат менамоем ва умедворем, ки ин масъала мавриди баррасии мақомоти дахлдор қарор хоҳад гирифт.
Мусайришо ҚИЗИЛОВ,
Ҷумъахон ЁРМОНОВ,
Лутфулло ТОҲИРБЕКОВ, омӯзгорони МТМУ № 30,
ноҳияи Рӯшон, ҷамъ 28 нафар
Баёни ақида (0) Санаи нашр: 15.03.2018 №: 55 Мутолиа карданд: 1485
