ҳуқуқ
ДАНҒАРА. ҶИНОЯТКОРӢ ДАР БАЙНИ НОБОЛИҒОН КОҲИШ ЁФТААСТ
Вобаста ба иҷрои муқаррароти Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» дар ноҳияи Данғараи вилояти Хатлон тадбирҳои зарурӣ андешида шуда, ҳамзамон барои пешгирии ҷинояткорӣ дар байни ноболиғон корҳои фаҳмондадиҳӣ пайваста гузаронда мешаванд.
Тавре Бунафша Файзиддинзода, раиси комиссия оид ба ҳуқуқи кӯдаки мақомоти иҷроияи маҳаллии ҳокимияти давлатии ноҳия, ба мо иттилоъ дод, соли гузашта дар муассисаҳои таҳсилоти миёнаи умумии ноҳия бо иштироки кормандони шуъбаи Вазорати корҳои дохилӣ дар ноҳия байни ноболиғон 18 чорабинии муштарак доир карда шуд. Самараи ҳамин чорабиниҳо буд, ки соли 2017 ҷинояткорӣ дар байни ноболиғон ба таври назаррас коҳиш ёфт. Аз ҷумла, дар давоми соли гузашта аз ҷониби 4 ноболиғ 8 ҷиноят содир шудааст, ки нисбат ба як соли пеш 10 ҳолат кам мебошад.
Хушбахтона, дар зарфи ду моҳи соли ҷорӣ ҳеҷ як мавриди қонуншиканӣ ё содир шудани ҷинояткорӣ дар байни ноболиғони ноҳия сабт нашудааст, ки натиҷаи онро масъулон дар тақвияти ҳамкории волидайн бо мактабу маориф ва корҳои фаҳмондадиҳӣ медонанд. Дар ин давра сохторҳои дахлдори мақомоти иҷроияи маҳаллии ҳокимияти давлатии ноҳия дар якҷоягӣ бо кормандони ШВКД дар муассисаҳои таҳсилоти миёнаи умумӣ, бо иштироки хонандагони синфҳои болоӣ 6 чорабинӣ гузаронданд.
Дар ҳамин ҳол, комиссия оид ба ҳуқуқи кӯдаки ноҳия тасмим гирифтааст, ки барои расидан ба натиҷаҳои боз ҳам назаррас соли ҷорӣ чорабиниҳои маърифатӣ - ҳуқуқиро миёни аҳолӣ, бахусус наврасон бештар ба роҳ монад.
Маҳмуд ҶӮРАЕВ, коромӯз
Баёни ақида (0) Санаи нашр: 26.03.2018 №: 59-60 Мутолиа карданд: 1244
