ҳуқуқ
ҶИНОЯТ ВА ҶАЗО
АВБОШӢ
Боздошти 16 нафар дар пайи муноқишаи гурӯҳӣ
Прокуратураи генералии Ҷумҳурии Тоҷикистон аз боздошти 16 нафар дар робита ба муноқишаи гурӯҳии ҷавонон дар шаҳри Душанбе хабар дод.
Дар робита ба ин ҳодиса, ки 28 март дар шаҳраки Ҳарбиён, маъруф ба Гипроземи пойтахт ба амал омад, аз ҷониби прокуратураи ноҳияи Синои шаҳри Душанбе бо моддаҳои 237 қисми 2 банди “б” ва 237 қисми 3 банди “а” - и Кодекси ҷиноятии Ҷумҳурии Тоҷикистон, яъне барои авбошӣ парвандаи ҷиноятӣ оғоз шуда, тафтишоти пешакӣ идома дорад.
Ба иттилои маркази матбуоти Прокуратураи генералӣ, саркардагони ин моҷаро ё амали авбошӣ Шоҳрух Розиқов ва Наҷибулло Баротов мебошанд. Онҳо баъд аз як муноқиша ва занозанӣ дар назди ошхонаи «Ҳаловат», воқеъ дар кӯчаи Борбади шаҳри Душанбе, ба қасди ниқоргирӣ аз якдигар рафиқони худро даъват мекунанд. Манбаъ дар шарҳи ин баёния менависад, ки «нафарони ҷамънамудаи Н. Баротов баъзеашон, аз ҷумла Қосимов Саъдӣ Маҳмадаюбович, Ҳамидов Анас Шодиевич ва дигарон аз рӯи маслиҳати пешакӣ дар дастонашон чубдаст, пораи қубури пластикӣ, арматур ва дигар ашёҳоро гирифта, дар рӯяшон ниқобҳои тиббӣ пушида» ба маҳали ҳодиса ҳозир мешаванд, ки боиси изтироб ва муддате халалдор гардидани тартиботи ҷамъиятӣ мегардад.
ОДАМКУШӢ
Қатли ҳамсар бо зарби корд
Кормандони милитсия ҳангоми гузарондани чорабиниҳои оперативӣ -ҷустуҷӯӣ марди 39 - солаи сокини деҳаи Зарафшони ноҳияи Кушониёнро бо гумони одамкушӣ дастгир намуданд.
Бино ба иттилои сомонаи ВКД, номбурда рӯзи 7 апрел дар хонаи истиқоматиаш ҳамсари худро бо зарби корд ба ҳалокат мерасонад. Ин ҳодиса дар пайи муноқишаи оилавӣ ба миён омада, нисбат ба гумонбар бо моддаи 104 қисми 1 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 12.04.2018 №: 73 Мутолиа карданд: 1151
