порлумон
ТОҶИКИСТОН ВА ӮЗБЕКИСТОН. ГУЗАРИШИ ХАТИ САРҲАД МУАЙЯН МЕГАРДАД
Дар ҷаласаи Маҷлиси намояндагони Маҷлиси Олӣ Шартнома байни Ҷумҳурии Тоҷикистон ва Ҷумҳурии Ӯзбекистон оид ба қитъаҳои алоҳидаи сарҳади давлатии Тоҷикистону Ӯзбекистон ба тасвиб расид.
Низомиддин Зоҳидӣ, муовини якуми вазири корҳои хориҷии Ҷумҳурии Тоҷикистон, зимни баррасии шартномаи мазкур иброз дошт, ки он 9 марти соли ҷорӣ дар рафти сафари давлатии Президенти Ҷумҳурии Ӯзбекистон Шавкат Мирзиёев ба Ҷумҳурии Тоҷикистон ба имзо расид. Шартномаи мазкур ба аҳднома байни Ҷумҳурии Тоҷикистон ва Ҷумҳурии Ӯзбекистон дар бораи сарҳади давлатии Тоҷикистону Ӯзбекистон аз 5 октябри соли 2002 асос меёбад. Шартнома дорои се замима: тавсифи гузариши хати сарҳади давлатии Тоҷикистону Ӯзбекистон аз рӯи қитъаҳои алоҳида, харитаҳои топографӣ ва харитаҳои электронӣ мебошад, ки қисми ҷудонопазири он ба ҳисоб мераванд. Тарафҳои аҳдкунанда ба мувофиқа расиданд, ки қисми боқимондаи сарҳади давлатӣ байни Ҷумҳурии Тоҷикистон ва Ҷумҳурии Ӯзбекистонро аз нуқтаи сарҳадии № 116 то нуқтаи сарҳадии № 117 бо шартномаи алоҳида муайян намоянд. Шартномаи делимитатсияи 192,37 километри хати сарҳади давлатии Тоҷикистону Ӯзбекистонро дар бар гирифтааст.
- Шартнома дар рӯҳияи дӯстӣ ва ҳусни ҳамҷаворӣ, эҳтироми мутақобила ва баробарҳуқуқӣ дар асоси принсипҳои эҳтироми мустақилият, соҳибистиқлолӣ, тамомияти арзӣ, дахлнопазирии сарҳадҳои давлатии ҳар ду кишвар, дахолат накардан ба корҳои дохилии якдигар таҳия гардида, бо мақсади дақиқ ва муайян кардани гузариши хати сарҳади давлатӣ байни Ҷумҳурии Тоҷикистон ва Ҷумҳурии Ӯзбекистон дар қитъаҳои алоҳида аз тарафи президентҳои ҳар ду кишвар ба имзо расонда шудааст, - иброз дошт Низомиддин Зоҳидӣ.
Мунаввари САФАР, «Ҷумҳурият»
Баёни ақида (0) Санаи нашр: 24.04.2018 №: 81 Мутолиа карданд: 5518
