ҳуқуқ
ҶИНОЯТ ВА ҶАЗО
КУШТОР
Маҳкумшудагон дубора даст ба ҷиноят заданд
Вазорати корҳои дохилӣ ба гумони даст доштан дар ҷинояти куштор аз боздошти ду нафаре хабар дод, ки қаблан низ барои содир намудани ҷиноят маҳкум ба зиндон шудаанд.
Шахсони гумонбар 13 апрели соли 2018 дар соҳили дар-ёи Панҷ, мавзеи бошишгоҳи «Шоҳ - Носир» - и деҳаи Дерушон, дар ҳолати мастӣ бо марди 43 - солаи сокини ноҳияи Рӯшон ҷанҷол намуда, ӯро шадидан латукӯб намудаанд. Дар натиҷаи ҷароҳатҳои вазнини ҷисмонӣ ин мард дар ҷойи ҳодиса ба ҳалокат расидааст.
Вобаста ба ин ҳолат, бо моддаи 110 қисми 2 банди «в» Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишот идома дорад.
Манбаъ аз ин афрод, ки ҳар ду истиқоматкунандаи деҳаи Дерушони ноҳияи Рӯшонанд, мардони 53 ва 46 - сола ном бурда, иттилоъ медиҳад, ки онҳо қаблан бо моддаи 335, моддаи 244 қисми 2 Кодекси ҷиноятии Ҷумҳурии Тоҷикистон суд шудаанд.
ҚАЛЛОБӢ
Боз як заминфурӯш боздошт шуд
Кормандони милитсия дар шаҳри Панҷакент марди 42 - солаеро боздошт намуданд, ки дар содир намудани ҷинояти қаллобӣ гумонбар мешавад.
Шахси гумонбар дар содир намудани ҷинояти қаллобӣ ҳанӯз моҳи ноябри соли 2013 як сокини деҳаи Фороби шаҳри Панҷакентро фиреб додааст. Боздоштшуда дар маслиҳат бо раиси хоҷагии деҳқонии “Савр” барои ҷудо кардани қитъаи замини наздиҳавлигӣ аз марди 56 – сола 2 ҳазору 100 - доллари амрикоӣ гирифта, бар иваз ба ӯ “Сертификати ҳуқуқи истифодаи замин” - ро бо роҳи сохтакорӣ тайёр намуда, додаанд.
Ба навиштаи сомонаи ВКД, ҳоло аз рӯи ин ҳодиса парвандаи ҷиноятӣ оғоз гардида, тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 02.05.2018 №: 86 Мутолиа карданд: 1108
