номаҳо
БА ХОТИРИ КӮДАКОНАМ МЕНАВИСАМ…
Ман ин номаро на барои худам, балки барои ояндаи фарзандонам менависам. Зеро фарзанд агар дуруст камол наёбад, шароити хуби зиндагӣ ва таълиму тарбия надошта бошад, ояндааш номаълум боқӣ мемонад.
Ман сокини ноҳияи Фирдавсӣ буда, бо шавҳари бемор ва 3 фарзанди ноболиғ зиндагӣ мекунам.
Дар оғози зиндагӣ ҳоли хуб доштем, аммо баъди таваллуди кӯдаки аввалинамон шавҳарам гирифтори бемории «рассеянный склероз» (суддабандии бофтаи узвҳо ва фаромӯшхотир) шуд.
Табобати тӯлонӣ гирифт, аммо ҳолаш бадтар гашта, оҳиста - оҳиста аз роҳ гаштан, ҳарф задан ҳам монд. Ба гуфтаи табибони пойтахт, ин намуди бемории рӯҳӣ дар ҷаҳон ангуштшумор аст ва табобати дақиқаш ҳанӯз пайдо нест.
Баъди ин ҳодисаҳо ранҷу азоби ман дучанд гардид. Аз як тараф нигоҳубини бемор ва аз тарафи дигар тарбияи фарзандон. Муаммо дар он аст, ки хонаи хушдоманам, ки он ҷо ба сар мебарем, 3 - ҳуҷрагӣ буда, 10 кас зиндагӣ доранд. Аз он як ҳуҷрааш ба оилаи ман расидааст, ки, албатта, барои 5 кас тангӣ мекунад. Барои бозӣ, хӯрокхӯрӣ, дарстайёркунӣ ҳамагӣ як ҳуҷра. Баъзе вақт кӯдаконам дилтанг мешаванд ва ними шабҳо аз хоби нозашон хеста, гиря мекунанд.
Шояд ин ҳам муаммо набошад. Вале дар як ҳуҷра бо падари беморашон зиндагӣ кардани се кӯдаки ноболиғ ҳар замон диламро фишор медиҳад. Шабҳо ҳамсарам аз дард менолад, бедор мешавад, шароити нигоҳубини беморони рӯҳӣ бароятон маълум аст. Ин ҳол даҳ сол боз идома дорад.
Сахт метарсам, ки фарзандонамон низ ба ягон беморӣ дучор нашаванд. Аз ин сабаб, аз роҳбарияти ноҳия ва аз касони эҳсонкор хоҳиш мекардам, ки агар имкон пайдо шавад, ҳамин хонаи 3 - ҳуҷрагиро гирифта, аз ягон гӯшаи шаҳр ҳавлӣ диҳанд.
Маҳбуба ТУЛАЕВА,
сокини ноҳияи Фирдавсӣ
Баёни ақида (0) Санаи нашр: 02.05.2018 №: 86 Мутолиа карданд: 2173
